Bah di Marudi enggau Beluru majak surut

MARUDI: Sapit Kepala Menteri Datuk Amar Douglas Uggah Embas tadi bisi datai ngabas rayat ti kena penusah bah ba pelilih mit Marudi enggau Beluru.

Rambau penemuai nya, iya ti mega Chairma Komiti Pengatur Penusah Nengeri Sarawak (JPBNS) madahka iya chukup puas ati enggau servis ti disediaka sida.

Lebuh nemuai ngagai endur penusah bah nyadi sereta sida ke kena penusah nya, Uggah mega diberi penerang pasal status bah ari Pemesai Pelilih Mit Marudi enggau Beluru.

Marudi dituntung penusah bah berengkah 2 Disember lalu balat nyadi kena 15 Disember tu tadi.

Bisi 56 endur bah di pelilih nya, lalu 14 udah surut, 20 nyau deka surut lalu 22 agi benung surut.

Naka ke diatu, semilan iku nyengkaum siku anak mit ari dua isi bilik di Kampung Anak Kerbau udah dipindahka ngagai Dewan Suarah Marudi nangika bah majak niki ba genturung pendiau sida.

Berebak enggau nya, di Pelilih Mit Beluru, bisi 28 endur kena penusah bah lalu nyau majak surut.

Penanggul ti ditapi mensia mayuh ba dua bengka mh pelilih nya iya nya sida putus penyambung jalai alun tang nadi pengawa mindah dipejalai lalu semua pekara dijaga enggau manah.

Bekal pemakai ari JPBNS mega dibagi enggau manah enggau kerejasama semua orang nyengkaum komuniti rumah panjai sereta genturung pendiau pelilih nya.

Ba lansa ke sama, pemesai opis Pelilih Mit Marudi, Markos Sibung merambu ngambika jalai ari pasar Marudi ngagai penyangkai feri ditinggika agi lalu Uggah minta ngambika sida nganjung ripot bekaul pekara nya ngagai Opis Residen Miri minggu baru.

“Pekara tu siti ari perambu ti manah laban bah disadang nyadi baru urung bulan Januari ngagai March taun baru ba nengeri tu,” ku iya.

Iya mega minta ngambika tim volunter ba rumah panjai enggau genturung pendiau dikenegapka agi tauka dikerembai ngambika sida ulih nyadi orang keterubah ngesah penusah.

Bela bisi datai ba pengawa nemuai nya Kaban Parlimen Baram Anyu Ngau enggau Pemangku Residen Miri Abdul Aziz.