Bajet 2021 : 68 peratus ungkup infrastruktur enggau pemansang menua pesisir

KUCHING: Bajet Nengeri Sarawak 2021 ti deka dibantaika Kepala Menteri Datuk Patinggi Abang Johari Tun Openg sehari tu deka kurang ari selama.

Iya madahka, bajet tu kurang ketegal pangka Covid-19 tang penyampau bekurang nya enda mayuh.

“Bajet ti deka dibantaika aku pagi ila (sehari tu) lebih ngagai pekara pemansang infrastruktur enggau menua pesisir.

“Urung 68 peratus ungkup pemansang tu, ke alai 32 peratus agi ungkup belanja bukai,” ku iya.

Abang Johari bejaku munyi nya ba aum pemberita pengudah Aum Besai Kaban Supreme Kaunsil PBB di Opis PBB ditu, kemari.

Kelimpah ari nya, iya nyambut manah Bajet Perintah Besai 2021 ti dibantaika Menteri Kewangan Tengku Datuk Seri Zafrul Abdul Aziz apin lama ke ngagihka RM4.5 billion ungkup pemansang infrastruktur di Sarawak.

“Mayuh agi bantu bukai bisi diberi baka agih ngagai Opis Menteri Pemansang Dagang enggau Gerempung Kerejasama dikena numbuhka bank mindah kin kitu (mobile bank) ngagai menua pesisir.

“Sida mega mantu, orang ti balat kena pangka Covid-19,” ku iya.

Tandu ila, agih belanja nya deka mantu dalam pemansang Sarawak taja semina nambah RM100 juta ari bajet sebedau tu.

“Ba aku nadai nyadi penanggul penyampau RM100 juta nya laban udah dikira mayuh.

“Pengabis nadai Perintah Besai meri baru agih belanja nyukat Tanah Adat Bansa Asal (NCR) lalu neruska sekeda projek ti sebedau tu dikinsil Perintah Pakatan Harapan,” ku iya.

Ku iya, diatu perintah benung bejalaika projek beungkus RM10 billion taja pan napi penanggul nadai chukup pekereja.

Dalam Bajet Sarawak 2021 nerima agih belanja RM4.5 billion ungkup ngaga sereta nyeruri infrastruktur ai, bekal kuasa karan, pekara pengerai enggau pekara pelajar.

Suara Sarawak