Bajet khas rumah sembiang deka dipinta ari perintah besai

SARATOK: Langgur penemu minta disedia bajet khas ungkup pemansang rumah sembiang pengarap ukai Islam ba menua tu deka dikenatai ngagai perintah besai.

Kaban Parlimen Saratok, Ali Biju madah iya deka nguji mai pekara tu ngagai perintah besai ngambika ulih nyaup ngemansangka pengarap Kristian ditu lebih agi ba menua pelilih Saratok.

“Diatu, perintah besai nadai nyendiaka ungkup belanja khas dikena ngadu rumah sembiang baka ungkup pengarap Kristian.”

“Agih belanja nya diatu (dikena mantu gerija) semina datai ari pemeri pengari rayat empu,” ku iya.

Ali madah munyi nya rambau bejadika Pengerami Makai Lemai Ngumpul Turu Gerija Anglika di Saratok lemai ensana.

Nangkan nya, Ali mega muji perintah nengeri laban bisi nyendiaka agih belanja ungkup pengarap ukai Islam nengah Unit Pekara Pengarap Bukai (UNIFOR).

“Ungkup belanja nya sigi dikena kitai ngadu rumah-rumah sembiang (kelimpah ari pengarap Islam) ba selampur menua Sarawak tu nyadi nya siti pengawa ke manah dikereja perintah nengeri.”

Beserimbai enggau pengerami malam nya, Ali bisi nyuaka ungkup belanja RM50, 000 dikena ngepunka wang turu Gerija Anglika.

Sama bisi datai Bishop Datuk Donald Jute, Bishop Nelson Ugas, Archdeacon Jackson Jarau enggau bala bukai.

Suara Sarawak