ARTIKEL

Baju gagung moden ditempa Qumang Craft

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Enti kelia baju gagung digaga ari kulit jelu, tang diatu baju gagong udah diinovasyen ari ubung nilon sereta ulih digaga sebaka baju gagong kulit jelu.

Endu Kumbau Daraman, 43 taun siku indu ti ngaga baju gagung moden madahka tegal penanggul ngulihka kulit jelu siga sida sebilik nempa inovasyen ngaduka baju gagung moden.

“Kelia kitai Iban muntang bulih kulit jelu lalu digagaka baju gagung laban kelia pengawa ngasu beburu endang daya pengidup kitai bansa ba rumah panjai.

“Tang laban jelu siga mayuh dijaga sereta ditagang Opis Kampung Sarawak (JHS) nangika jelu tu punas,” ku iya lebuh dirandau Suara Sarawak, apin lama ke udah.

Ku peranak Rumah Ajau, Ulu Kota, Pakan nya madah, baju gagung tu endang nyadi kelai baju asal bansa Iban.

Endu Kumbau Daraman.

“Nengah pengawa begagaka baju gagung moden, adat asal kitai enda lenyau laban terus ditan nyadi siti pekayan ti mesti diayanka lebuh maya pengerami Hari Gawai tauka hari besai bukai.

“Baju gagung nyelai laban kelia kitai enda milih bansa kulit jelu ti dikena baka kulit jugam, kulit engkuli enggau jelu bukai.

“Enti dibanding enggau baju gagung asal, mayuh orang enda berani ngena baju gagung sengapa laban bisi sekeda bansa kitai ngembuan penti pemali ba jelu tauka alah bulu,” ku iya.

Ari pekara nya, iya madahka diri lalu bulih runding nengkebang baju gagung moden ti enda deka ngachau pendiau chura asal tauka ngasuh orang nangika sekeda penti pemali ba jelu.

“Aku enggau tujuh iku menyadi aku ke bukai bisi ngaga baju gagung moden seraya ngetanka pekayan asal bansa kitai.

“Gagung nya digaga ari sebengkah ubung nilun ti diudar ari menua luar dalam bemacham chura nitihka chura bulu jelu ti deka dikena,” ku iya.

Endu Kumbau madahka diatu sida agi bejual baju gagong tu ba luar laban agi nganti lisin pemendar ari Komiti Serikat Malaysia (SSM) enggau ngerejister ba Opis Kraftjari Malaysia ngelakuka baju nya ba media rama.

“Lisin agi dipinta nengah nama Qumang Craft dipelabaka deka tembu enda lama agi.

“Taja kami semina bejual di luar, tang baju gagong moden nerima timbal ti chukup manah ari orang luar, kelebih agi bansa Dayak,” ku iya.

Baju gagung moden ti digaga ari ubung nilun.

Iya madahka, taja mar ngudar ubung nilun empas ari pandemik Covid-19 sida sebilik enggau naka ulih mutarka penanggul nya.

Indai ngagai siku anak tu madahka, baju gagung moden dijual iya ngena rega RM500 ngagai RM700 siti bepanggai ngagai perengka pengias baju nya.

“Ngagai mensia mayuh ti bisi ati deka meli baju gagung moden, kita tau betelefon ngagai aku empu ba lumur 0194876007 tauka ngelawa Facebook Endu Kumbau Daraman.

“Kelimpah baju gagung, aku mega bisi nyual produk kraftjari bukai baka raga enggau lanji.

“Aku mega bisi ngaga kelas belajar ngaga baju gagung moden, ungkup siku nembiak ti deka enggau kelas tu aku semina ngeletak bayar RM250 aja,” ku iya.

Ku Endu Kumbau, iya ngarapka semua nembiak rebak baru terus ngetanka adat asal sereta ngembuan pekayan tradisional tu ngambika enda punas dudi hari.

“Besai pengarap aku ngambika Qumang Craft nerima timbal positif ari bala mayuh laban udah lisin kami tembu ila, kami deka ngelakuka produk tu ba media rama.

“Juluk ati aku ukai semina deka nyual produk tu ba Sarawak aja, tang aku merambu deka ngelakuka produk tu ngagai menua luar laban kitai ngembuan baju asal ti nyelai ari orang bukai,” ku iya.

Kelas belajar ngaga baju gagung ti diatur Endu Kumbau.

 

Sekeda lanji enggau raga mega bisi dijual Endu Kumbau kelimpah baju gagung moden.

BERITA LAIN

BERITA TERBARU