Bakih tusah patut dibantu, anang diketawa

SERIAN: Raban bansa Bidayuh patut muai ulah ti baka ‘gerama’ nyema deka meda komuniti tu terus besemekih enggau bansa bukai di nengeri tu.

Menteri Pelajar, Sains enggau Pansik Teknologi, Datuk Seri Michael Manyin Jawong madah, runding ti baka nya semina deka ngujungka bansa Bidayuh tinggal ba jeman ekonomi digital diatu.

Ku iya, bansa Bidayuh patut beserakup sereta seruran nyikap diri dikena nentuka komuniti nya terus begulai nyingkang maju manggai taun 2030.

“Buai sereta ngiarka penemu ‘gerama’ tu jauh-jauh. Enti bakih kitai puntan, kitai patut mantu iya angkat baru lalu meri iya peransang sereta nyukung sida.

“Anang ketegal bakih kitai nya puntan, kitai terus ketawaka sida. Tu salah, patut iya bantu bakih kitai nya nyapai juluk ti dikeingin iya,” ku iya rambau Pengerami Nyuaka Setipikit Nyulut ba Dewan Serbaguna Ranchan, ditu kemari.

Manyin madah, bala anak bansa Bidayuh enda kurang pengelandik enti ba bidang akademik.

Ku iya, nembiak Bidayuh rebak baru patut nyikap diri enggau penemu ti bekaul enggau teknologi pemadah kelimpah belajarka jaku Inggeris.

“Dunya kereja diatu ngemeratka pengelandik ba jaku Inggeris lalu tu nyadi siti pengelebih ngagai barang sapa anak Bidayuh nyema sida deka bulih batang pengawa ke lebih manah,” ku iya.