KUCHING: Urung 1,200 anak soldadu darat enggau staf Opis Menteri Penyaga Menua Malaysia (Mindef) ke beumur 12 ngagai 17 taun ba selampur Sarawak udah nerima dos keterubah vaksin Pfizer Cominarty, ditu kemari.
Penulung Tuai Direktor Servis Pengerai Kuching Markas 1 Divisyen Kolonel Dr Meor Adzhary Sagiruddin madah, sepenyampau 732 iku nembiak nya anak soldadu enggau staf Mindef di Kem Penrissen ditu.
“Ungkup program vaksinasyen sehari tu (kemari), kami ngena chara pansa lalu baka ke udah dipejalai ba Kem Muara Tuang sebedau tu.
“Kelimpah ba Kuching, kami mega muka Palan Meri Vaksin (PPV) pansa lalu di Kem Oya, Sibu seraya tiga agi kem kami bejalaika PPV iya nya di Miri, Bintulu enggau Sri Aman,” terang iya.
Meor mansutka jaku nya lebuh dirandau pemberita ba program vaksinasyen anak soldadu darat enggau staf Mindef di Rejimen Ke 4 Kor Armor Diraja, Kem Penrissen, ditu kemari.
Ku iya ba Kem Sri di Miri, sepenyampau 36 iku anak soldadu udah nerima vaksin sehari tu (24 September).
Ba lansa sama, iya madahka program vaksinasyen tu semina ungkup nembiak ke udah genap 12 taun aja baka dipadahka perintah.
“Enti sema bedau genap, kami deka ngaduka pekara tu laban diatu Opis Pengerai Nengeri Sarawak (JKNS) mega bejalaika program tu.
“Enti sema JKNS tauka raban sekula ngatur program tu enda lama agi, sida ulih ngelawa sebarang PPV tu lalu ukai reti dalam kem tu aja,” terang iya.
Meor mega madah, sida deka bekerejasama nentuka nembiak beumur 12 taun enggau tuai ari nya deka nerima vaksin enggau lengkas.
Ngelansa silik, Meor madah, naka diatu sida nadai muka PPV ungkup mensia mayuh tang semina ungkup anak soldadu sereta staf Mindef aja.
“Taja pia, enti sema bisi peminta ari JKNS, kami semampai sedia nyaup sdia,” ku Meor nerang baru.
Ku iya, pengawa meri vaksin dos kedua ungkup anak soldadu darat enggau staf Mindef nya deka dipejalai kena 14 Oktober ngena konsep pansa lalu.
