SIBU: Bala pengajar diperansang nyikap diri ngena penemu ekonomi baru dikena ngadaka nembiak bepenemu sereta seirirs enggau ubah dunya kemaya hari tu.

Premier Sarawak, Datuk Patinggi Tan Sri Abang Johari Tun Openg madah, pekara nya laban bala pengajar ngembuan tanggungpengawa ke besai ba pengawa nempa penau nembiak.

Ku Abang Johari, nya nyengkaum penau ba mayuh bengkah bidang sereta ulih meri bonus tambah ngagai pengaya tanah ke bisi ba Sarawak.

“Nya alai, bala nembiak sekula patut ngembuan penau nya ngambika sida nyadi pakar ba subjek sains lalu ulih nguasa data sains sereta informasyen ke bisi.

“Juluk Sarawak jemah bepelasarka ekonomi baru begunaka bala pakar baru dikena nyungkak agi tikas ekonomi sereta pengereja pengawa ti sebela baka ke dipinta ba makit,” ku Abang Johari.

Iya mansutka pekara nya ba Program Bejadika Aum Ngatur Pelajar Sekula Sekondari Sarawak ke-57 ba sebengkah hotel tebilang ditu kemari.

Abang Johari mega madahka Perintah Sarawak naka ulih ngerembaika ekonomi Sarawak ngagai ekonomi baru setipak enggau latih ke diberi ngagai bala nembiak ba sekeda bidang penau.

Ku iya, enti menua tu ngembuan nembiak ke pakar ba sekeda bidang tang ekonomi menua tu agi ba tikas ke enda ngemantupka ati, nya chukup timpang ti ngujungka raban nembiak nya ngiga pengawa puang ba luar Sarawak.

“Nya guna kitai patut meri latih nengah pelajar Sains, Teknologi, Injinir enggau Matematik (STEM) bepelasarka sains sereta bekaul enggau pengaya tanah.

“Enti pekara nya ulih digaga kitai, menua Sarawak deka nyadi sebengkah menua mansang sereta ngembuan penatai pemisi ke tinggi ba taun 2030 ila.

“Tu mih juluk ati kitai begulai enggau Perintah Sarawak, bala pengajar enggau rayat lalu enti ekonomi kitai datai ba tikas nya, menua tu deka nyadi pemain ba tikas dunya lalu anang semina jaguh ‘kampung’ aja.

“Nya alai, Perintah Sarawak seruran mantu ari sukut pelajar lalu pengurang ke bisi nya patut dikerembai sereta disetipakka enggau pemansang kemaya hari,” ku tandu iya.