Balai Ringin betuah dulu diberi sebuah kompleks kumba

BALAI RINGIN: Peranak Balai Ringin chukup betuah laban udah tu ila deka bisi sebuah kompleks lumba taja sitak nya bedau ditukuka rasmi nyadi pelilih mit.

Menteri Nembiak enggau Lumba Datuk Abdul Karim Rahman Hamzah madahka naka diatu bisi 19 buah kompleks lumba udah digaga ba serata Sarawak ti nyelinting bagi menua ti besai.

“Pelasar kitai dalam pekara tu iya nya, tiap bagi menua mesti bisi ngembuan sebuah kompleks lumba.

“Udah nya baru kitai ngaga kompleks lumba ba pelilih menua, nyema bisi pelilih menua mit ngaga peminta dulu, kitai bedau ulih ngemendarka laban meri awak ngagai pelilih menua,” ku iya.

Karim bejaku munyi nya rambau Program Nasih Tanah Kompleks Lumba Balai Ringin ti dipenyadika Kepala Menteri Datuk Patinggi Abang Johari Tun Openg ditu, kemari.

Ku iya, peranak dia patut nyukung pengari rayat sida, Adun Balai Ringin Datuk Snowdan Lawan laban udah ngaga peminta numbuhka kompleks lumba ba pelilih mit nya.

“Seninjik bendar iya (Snowdan) nyadi Menteri Muda Nembiak enggau Lumba ulih ngaga peminta tu.

“Enti meda ari perambu kompleks tu ila deka disikap enggau keresa lumba pemadu baru baka alur belanda (trek belanda) getah, padang bol, panggau lumba, gelanggang badminton, gelanggang sepak trakraw, padang futsal, dinding ‘rock climbing’ enggau opis,” ku iya.

Tandu iya, kompleks ti dipelaba deka tembu dalam timpuh 18 bulan nya nyadi sebagi ari palan endur nembiak rebak baru ngayanka penau sida dalam aktiviti lumba ti engkeman.

“Palan baka tu ulih nyeliahka nembiak rebak baru ngereja pengawa ti nadai mai penguntung.

“Nya alai, perintah andalka ulih ngangkatka nembiak ti beguna enda ngira ari mengeri tauka menua pesisir.

“Aku pechaya, lebuh palan tu udah tembu ila, palan nya ulih nyadi ‘rumah kuasa sukan’ (sport power house) ke alai mayuh raban nembiak ba pekara lumba ulih dipansutka,” ku iya.

Suara Sarawak