Balai Ringin patut lengkas diangkat nyadi pelilih mit

BALAI RINGIN: Menteri Muda Nembiak enggau Lumba Datuk Snowdan Lawan ngansak Perintah Sarawak ngelengkaska agi pengawa ngatur Balai Ringin nyadi pelilih mit di menua tu.

Ku iya, Balai Ringin ngembuan tiga sitak ngaul 236 buah genturung pendiau ti dibagi ngagai tiga zon, iya nya Zon A di sitak Serian, Zon B di Simunjan enggau Zon C di Sri Aman.

“Ari tiga bengkah zon tu aku magi siti zon ungkup sekeda bidang ti engkeman, baka zon A ungkup sektor pelajar, nembiak enggau lumba.

“Nya kebuah aku milih kompleks lumba digaga ba sitak tu, laban SMK Balai Ringin aja udah ngembuan urung 2,000 iku nembiak sekula,” ku iya.

Snowdan bejaku munyi nya lebuh Program Bejadila Kompleks Lumba Balai Ringin ditu, pagi tadi.

Tandu iya, Zon B ditemu engkeman ngerembaika sektor dagang temuai enggau produk kraf jari.

“Pelilih di Simunjan ngembuan palan tasik ti manah ungkup eko-dagang temuai baka lumba ai, program ngelantang ati enggau ke bukai.

“Kelimpah ari nya, sekeda palan wong di Tuba, Mentu enggau ke bukai mega ulih nyadi produk dagang temuai ti manah kelimpah produk kraf jari,” ku iya.

Iya madahka nengah agih RTP iya empu, penyampau RM350,000 agih belanja udah diberi dikena numbuhka Palan Kraf Jari di Balai Ringin.

Udah nya, ba Zon C, Snowdan madahka palan tu manah ungkup sektor betanam betupi enggau dandang besai.

“Kebuah pia, laban Lachau enggau Pantu nyadi Palan Ngumpul, Proses enggau Mungkus (CPPC) asil betanam betupi enggau dandang besai.

“Tambah mega, di Sri Aman mayuh palan endur orang bumai, nanam sawit, sibau, lada, betupi kambin, rusa, ikan enggau ke bukai,” ku iya.

Nya alai, iya madahka nengah pelilih mit Balai Ringin ti baru ila, muntang agi iya matau projek pemansang ti diperambu ba sitak nya.

Adun Balai Ringin nya mega madahka iya merambu minta digagaka sebuah waterfront ba Balai Ringin ti dipelabaka beungkus RM35 juta.

Tandu iya, nyema Pelilih Mit Balai Ringin tu udah diatur ila, pelilih nya mega deka begunaka Balai Polis enggau Balai Bomba.

Suara Sarawak