KAPIT: Lagu Terabai Pengerindu udah mujur mai raban Teresak Borneo menang Muzik Video Antap diatur Cats FM apin lama ke udah.
Serak tu, sida sebuat ngenang pasal ari ni penatai nama Teresak Borneo enggau bekunsi cherita pejalai karier seni sida ngagai Suara Sarawak.
MODEN, TRADISIONAL
Vokalis iya, Dickson Chelaes madahka band Teresak Borneo tu ditumbuhka dalam taun 2017, kira tiga taun ke udah.
Genteran jaku Teresak diangkat tu ditibak ari leka jaku telesak, tiris tauka peturun ke mai reti utai ke nemu nyumbuk, tumbuh enggau mansang besai.
“Lalu leka jaku Borneo tu dikena laban konsep band kami ti begulaika instrumen moden enggau traditional, sapé ti nunjukka main asal bansa Dayak di menua Sarawak enggau Borneo.
“Bepun ari pengawa belagu sereta main muzik dikena ngisi maya lepa kami lalu meransang diri empu ngambi bagi dalam pekit Giggs sereta Battle of Bands di Kapit.
“Lebuh nya kami sebuat semina deka nguji enggau orang ngeruh ai aja lebuh masuk Pekit Borneo Talent Awards 2017 ti diatur di Sibu.
“Nadai nyangka bulih pemujur lebuh kami masuk renggat kepenudi tauka dipilih nyadi finalis lalu bulih dua anugerah; The Most Entertaining Talent Award enggau The Most Popular Talent Award.
“Ari nya kami sebuat mutus ati ngemajuka agi pejalai raban kami lalu ngeluarka lagu single keterubah, Terabai Pengerindu ba tahun 2018,” ku Dickson ngepunka randau.
TERABAI PENGERINDU
Asal band tu bisi lima iku, Dickson Chelaes (ketuai, vokalis), Louis Fernandez (pemain sapé), Malcom Andrian (keyboard), Marven Asing (gitar) enggau Browen Sulang (dram).
“Semua kami tu endang peranak asal ari menua Kapit empu, menua ke tebilang enggau pengaya sungai lebih agi Ikan Empurau.
“Lagu Terabai Pengerindu, nyadi single keterubah ti mujur ngangkatka nama kami sebuat ba dunya pemerindang kitai di menua tu.
“Leka lagu ditulis enggau ditengkebang aku empu lalu tiun diaduka bala kami ke betubuh lima iku nya tadi.
“Lagu tu nyeritaka pemesai reti enggau kuasa pengerindu ti datai ari ati ke tuchi, baik nya ngagai sida ke laki bini, pangan tauka diri sebilik”
“Enti nyema kitai sama bela beterabaika diri enggau penyayau sereta pengerindu ti tegut ke pangan diri, kitai enda mudah bebali ati tauka ngelengka ke pangan diri nyentukka pengujung nyawa,” ku Dickson ngenang cherita lagu ari single keterubah sida.
TALUKKA TANAH KENYALANG
Berita ke pemadu baru ari Teresak Borneo ku Dickson ke alai sida mujur masuk renggat final ba pekit Cats Xposed Award Volume 2 ke diatur Cats Fm.
Single kedua diberi nama Terumpang udah dikeluarka dalam tahun 2019 suba lalu nerima timbal chukup manah ari bala peninga nyengkaum view ba Channel Youtube manggai 229,000.
“Lagu tu kebendar nusui pasal penyinu ati pengudah puntan nirika meligai pengerindu ketegal dilengkaka sulu ti udah berubah ati.
“Lagu ketiga, Raja Kenyalang ditengkebang dikena nyepu semangat patriotik, temegah ati sereta talukka ngagai menua enggau bansa di Tanah Kenyalang tu.
“Kitai bela nemu, Burung Kenyalang nya kelai menua ti dikemegahka Sarawak, indah baka aki ini kitai bebasaka aki Lang Sengalang Burung menya.
“Lagu Raja Kenyalang diatu mega benung besemekih dalam Carta Cats Xposed Ethnic Division kelimpah nerima lebih 20,000 view ba channel Youtube Teresak Borneo,” ku Dickson.
SUKUNG LAGU KITAI
Ke penerang, raban Teresak Borneo tu bisi channel kediri empu lalu bala peminat tau meda lagu ba channel nya nengah link ke di baruh tu.
Official Facebook page https://www.facebook.com/teresakborneo/
Oficial Instagram https://www.instagram.com/teresakborneo_tb/ Official YouTube channel https://www.youtube.com/channel/UCLxCNkjAJbH49OMjz9_etgA
“Ke diatu kami sebuat apin ulih nerima kangau merindang laban penanggul Atur Mindah Betagang (PKP).
“Taja kami sama datai ari Kapit tang enda begulai laban sekeda nya benung nampung pelajar enggau nitihka periuk asi diri ba menua bukai,” ku Dickson nyimpul randau.
