Bangkai lelaki melepung semak Jematan Igan

SIBU: Bangkai lelaki dipelaba peranak menua luar bisi pantang kala enggau empelawa ditemu ba Sungai Sebedil, Batang Igan semak ditu, lemai kemari.

Bangkai enda dikelala nya ditemu mensia mayuh ti tepedaka bangkai mensia melepung enggau anyut ba sungai semak Jematan Igan ditu.

Ketuai Polis Pelilih Sibu ACP Stanley Jonathan Ringgit madah, sida nerima kangau ari mensia mayuh madahka pekara nya urung pukul 11.50 pagi Hari Lima nyin tadi.

“Tiga raban Marin begulai enggau siku Sarjan ari Opis Sungai Merah udah dipinta ngesah ngagai endur penusah nyadi ngena bot marin.

“Sida mega mai bangkai lelaki nya ngagai Jelatung Arang semak Wharf Ekspres Sibu,” ku iya lebuh dirandau pagi tadi.

Iya madah, sida nadai tetemuka sebarang dokumen pengelala lebuh meresa tubuh niang ti dipelaba peranak menua luar.

“Bangkai lelaki ke udah but ngena tanchut jean chura biru enggau baju-T kolar chura mirah

“Bisi pantang kala ba lengan kiba enggau empelawa ba perut,” terang Stanley.

Naka diatu ku iya, piak polis nadai nerima ripot pasal orang lenyau ba pelilih nya lalu nguji nyidi orang sebilik enggau niang dipejalai.

“Bangkai niang udah dianjung lalu disimpan ba bilik mati Sepital Sibu seraya nganti tubuh diperesa enggau dipansik.

“Niang engka lemas lalu kes tu dikumbai mati ngenyit (SDR) dataika ripot pansik diulih,” tambah iya.

Suara Sarawak