Bangkai tinggal pala ditemu ba Sungai Ulu Lobak, Lundu

LUNDU: Bangkai siku lelaki semina tinggal pala, papung tubuh, enggau kaki kiba dipelaba kena serang baya ditemu peranak genturung pendiau ba Sungai Ulu Lobak urung jam 7 pagi tadi.

Ketuai Balai Bomba enggau Penyah Penusah Lundu, PPgB Putra Ila madah, pansik tumu ngenukuka bangkai ke dutemu nya, Fairus Latip beukur 37 taun ti diripotka lenyau maya ngetan bubu gerama ba sungai Chupin kena pagi Hari Empat tu tadi.

Nitih penerang, pengawa nyidi ba hari keterubah dipejalaika BBP Lundu mujur tetemuka perengka dikena nangkap gerama dipenggi lelaki nya tang tubuh iya nadai dipeda dia.

“Kami dipadah bangkai iya ditemu siku sida semenua urung pukul 7 pagi tu (tadi) ba Sungai Lobak Ulu penyauh 30 minit pejalai nengah sungai.

“Pengudah diperesa lelaki nya dipelaba kena serang baya maya ngetan bubu laban tubuh iya semina tinggal pala, papung tubuh enggau kaki sepiak kiba.

“Operasyen diketu lalu bangkai lelaki nya udah diserag ngagai piak polis ngambika dipansik silik,” ku iya nengah sebengkah penerang, sehari tu tadi.

KASIH AMAI…Pendiau tubuh ke udah kepung dipelaba udah kena tagup baya.

Suara Sarawak