KUCHING: Bansa kayu RT-Paulownia ti ditanam TSG Green Sdn Bhd dikeandal ulih nyungkak industri kayu ramu Sarawak dudi hari.
Kepala Menteri Datuk Patinggi Tan Sri Abang Johari Tun Openg madah, kebuah pia laban pun kayu tu manah ditanam ba menua tu kelimpah nyapai polisi Perintah Sarawak dikena nyaga pemanah rampa menua lalu seriris enggau polisi kampung Sarawak iya nya nanam baru pun kayu.
“Pun kayu tu ulih ditebang pengudah empat ngagai lima taun lalu pengudah ditebang, pun kayu nya deka tumbuh baru.
“Tu baka diperati aku di Norway enggau Finland pengudah sida nanam pun kayu Pain nyentuk bisi industri kayu ramu enggau asil ari kampung ti ditanam baru.
“Nya kebuah, aku mega bisi polisi ti sebaka iya nya kampung kitai ti ditebang mesti ditanam baru lalu entara pun kayu ti jampat tumbuh iya nya Paulownia,” terang iya.
Abang Johari mansutka jaku nya ba aum pemberita pengudah bejadika makmal nanam RT-Paulownia keterubah di Sarawak, ti dipejalai TSG Green Sdn Bhd di Titanium Tower, Brighton Square, ditu ensana.
Sama datai Menteri Muda Perambu Mengeri, Pengatur Tanah enggau Rampa Menua, Datuk Len Talif Salleh, Direktor Opis Kampung Sarawak Datuk Hamden Mohammad enggau pemungkal ke mega Tuai Pegawai Eksekutif Kumpulan TSG Green’s Datuk Chris Chung.
Abang Johari madah, kelimpah ari kayu, daun pun kayu Paulownia mega meri pemaik ngagai pengidup mensia pengudah ulih nyedut mayuh karbon dioksida.
Nya alai ku iya, makin mayuh pun kayu tu ditanam dikena nagang karbon dioksida.
“Nya kebuah, pun kayu tu bisi dua pemanah iya nya kitai ulih nanam ba kampung ti udah ditebang lalu ulih nyedut karbon dioksida,” terang Abang Johari.
Pia mega ku iya, daun pun kayu Paulownia mega ulih nyadi pemakai jelu enggau sum organik.
Kayu Paulownia ke mega kayu aluminium udah dikena dalam industri baka berumah, kereban berumah, kereban muzik enggau jemari.
Ba menua bukai baka Jerman, sida ulih ngena biojisim pun kayu Paulownia ungkup industri bukai baka biofuel.
Taja pun kayu nya empu ukai asal ari Malaysia tang varian nya engkeman laban pun kayu Paulownia ulih idup dalam tropika menua tu.
