KUCHING: Lebih RM40,000 bantu mujur dipupu ari mensia mayuh nengah Facebook Persatuan Anak Borneo Semenanjung (ABS) ungkup anak niang Ronwina enggau Damian.
Nitihka penerang, ABS ngarika Robert ke mega waris semak enggau penyaga anak niang meri besai terima kasih ngagai mensia mayuh ke udah gerah jari meri bantu belanja ngagai sida tiga menyadi nya.
“Nyadi, kami ari ABS ngarika Robert meri besai terima kasih ke pemanah enggau penyiru kita ke udah gerah jari mantu anak niang tu.
“Semina Petara aja ulih malas pemanah kita ke enda belampung ati mantu tiga iku anak niang Ronwina enggau Damian tu,” ku pengari ABS.
Ku pengari ABS, pupu belanja penyampau RM40,000 diberi mensia mayuh nengah penerang dibantaika ba Facebook ABS urung sebulan ke udah.
Ambika semua terang, Robert deka ngena duit pupu nya melanja tiga iku anak niang lebih agi ungkup pelajar enggau belanja sekula.
Ungkup penerang semua, niang Ronwina enggau Damian bebadi nyawa ketegal kena tangkap karan di Cameron Highland, Pahang sebulan ke udah.
Pia mega, tubuh niang Ronwina enggau Damian udah dikubur ba Pendam Kristian Shah Alam. Diatu, anak niang diau enggau ibu iya, Poly Pandong di Kuching.
