KUCHING: Urung 3,000 ruang bilik (KIR) di Parlimen Puncak Borneo deka nerima bantu barang pemakai enda lama agi, ku Datuk Willie Mongin.
Sapit Menteri Pengawa Bekebun enggau Komoditi nya madahka agih belanja bantu barang pemakai tu diberi nitihka udah disemaya Perintah Besai iya nya RM300,000 ungkup siku MP nyengkaum MP penyakal dikena ngelempungka tating penusah ke ditapi rayat nyerumba pangka pengerekai Covid-19.
“Ba taun 2020, palan servis kami udah meri bantu pemakai ngagai 17,380 KIR ti balat dituntung penanggul ketegal Covid-19.
“Ungkup taun tu, kenyau bulan Januari, kami udah meri urung 3,529 bantu pemakai ngagai sida ti diasuh kuarantin, kampung ti bejalaika Atur Mindah Betagang Bepekul (PKPD) enggau raban seranta,” ku iya.
Willie ke mega Kaban Parlimen (MP) Puncak Borneo madah bejaku munyi nya dalam siti penerang media ditu, kemari.
Ku iya, ngena agih belanja RM300,000 tu iya andalka ulih mantu 20,000 KIR iya nya mungkur palan ti lebih besai.
“Enti dikira RM300,000 nya chukup ungkup 3,000 KIR aja, nya alai kami enggau naka ulih ngatur agih belanja tu manah awakka semua KIR ti begunaka bantu bulih bantu.
“Ba sitak aku, raban pengatur udah ngagihka bantu ngagai sekeda raban diselinting kelebih agi ruang bilik ti dikuarantin, ruang bilik ti seranta, ruang bilik B40, ruang bilik ti lenyau pengawa enggau ruang bilik ti begunaka bantu,” ku iya.
Ku Sapit Menteri Pengawa Bekebun enggau Komoditi nya, ungkup sitak iya sebuah KIR deka nerima 10 kilogram berau, setin sadin ikan, setin sadin kari manuk, sepikit kuie kibin, sepikit milo enggau tiga pikit mi.
Iya mega ngarapka enggau bantu tu, sida ulih ngelempungka tating belanja rayat lebuh napi pengerekai penyakit Covid-19.
