Bantu kedua udah diterima peranak Rumah Manggi

LIMBANG: Raban Saberkas Pampang Batu Danau udah nyuaka bantu pemakai enggau kereban diguna ngagai 34 Tuai Bilik (KIR) Rumah Manggi Igom, kemari.

Nitihka penerang, nya bantu kedua diberi Adun Batu Danau ti mega Chairman Saberkas Pampang Batu Danau, Paulus Palu Gumbang ngagai peranak dia.

Kelimpah ari Paulus, raban ari Komiti Penyangga Penusah Bagi Menua (JBBB) Limbang mega bisi nganjung bantu kia ti betuaika Sapit Residen Bagi Menua Limbang, Sebi Abang.

Bantu kedua kali nya udah dianjung terus ngagai Kampung Menuang Baru ditu ketegal peranak dia diasuh bepekul kenyau ari 8 April nyin tadi.

Sekumbang ke bepekul sida serumah ditagang pansut lalu orang luar enda diasuh niki ngagai rumah panjai nya dikena nagang Covid-19 ngerekai.

Sama nganjung bantu nya Pegawai Kaunseling Opis Pengintu Pengelantang Mensia Mayuh (JKM) Limbang Alexander Lukar enggau Pegawai Khas Adun Batu Danau ti nyadi Sekretari Saberkas Pampang Batu Danau Jimmy Ngindang Bau.

Suara Sarawak