KUCHING: Ketuai Raban Penyanding Penemu Penyaga Menua Komiti Tinggi British ke bepalan di Kuala Lumpur, Kapten Simon Hindmarsh sedia berundingka bantu pemeri ngagai bala niang Datuk Sarjan Dr Awang Raweng ari Perintah Britain.
Taja pia, iya nadai nyamin pekara nya taja Awang penerima pinchin ninting taun ari Perintah Britain.
“Aku pan enda ulih ngenuku pekara tu tang kami naka ulih berundingka pekara tu lalu kami deka mantu bala niang enti pengawa tu ulih dikemujur.
“Tang enti enda ulih ketegal polisi enggau pekara bukai, laban beretika pekara tu ba luar bidang kuasa aku sereta pemutus nya ba Perintah Britain,” ku iya lebuh dirandau pengudah meri basa kepenudi ngagai niang Awang Raweng ba Dewan Suarah, ditu tadi.
Nya kebuah, Simon ngarapka pekara enda ngeruga hak ti diberi sida ngagai niang Awang.
“Aku datai ditu ukai semina meri basa kepenudi tang ngarika Ratu Elizabeth II ti udah betemu enggau Datuk Awang lalu piak Perintah Britain ngenataika penyinu ati ngagai sida sebilik,” ku Simon.
Terang Simon, niang Awang nerima basa kedua pemadu tinggi ari Britain lebuh diberi midul George Cross.
Ngelansa silik, iya madah ari sukut tusun hierarki, midul George Cross nya endang amat di baruh midul Victoria Cross.
“Victoria Cross diberi ngagai orang ti berani tang George Cross nya diberi ngagai sida ti berani enggau jarang dikereja orang baka pengawa dikereja Awang dalam taun 1951 suba,” terang iya silik agi.
Niang Awang Raweng sulai ba umur manggai 104 taun urung pukul 2.15 lemai Hari Lima tu tadi ba rumah iya di Jalai Padri, Sri Aman ketegal sakit tuai.
Iya aja rayat Malaysia ti nerima midul George Cross ari Perintah British enggau dikangau tiap dua taun ngagai London ngulu Pengerai Ngintu Hari Pengada Ratu Elizabeth II.
Kelimpah ari midul George Cross, iya mega diberi anugerah Panglima Setia Bintang Sarawak ari Perintah Sarawak dalam taun 2018, Pingat Jasa Malaysia 2011, Queen Elizabeth II Diamond Jubilee Medal 2012, Queen Elizabeth II Golden Jubilee Medal 2002, Queen Elizabeth II Silver Jubilee Medal 1977 enggau Queen Elizabeth II Coronation Medal 1953.
Kelimpah ari nya, iya diberi anugerah Ijazah (Kehormat) Sarjana Pengajian Strategik ari Universiti Pertahanan Nasional Malaysia pada 27 Oktober 2015.
