Bantu pemakai ari Perintah Sarawak tembu disadung sehari tu

KAPIT: Pengawa nyadung bantu pemakai ngagai serata endur di Sarawak dipelaba tembu sehari tu (11 Jun), ku Datuk Patinggi Abang Johari Tun Openg.

Kepala Menteri madah, enam Dun ke udah tembu 100 peratus iya nya N.8 Satok, N.15 Asajaya, N.24 Sadong Jaya, N.27 Sebuyau, N.37 Bukit Saban enggau N.54 Pelawan.

“Naka tu semua pengari rayat, pegawai opis perintah, Palan Servis Adun, ketuai renggat baruh enggau volunteer naka ulih nentuka semua tuai bilik bisi nerima bantu,” ku iya.

Iya madah munyi nya ba Pengerami Nyuaka Bantu Pemakai Sarawakku Sayang (BKSS) di Pasar Kapit ditu, kemari.

Ungkup Kapit, ku Abang Johari, bisi 28,118 iku tuai bilik (KIR) deka nerima bantu pemakai sehari tu (11 June).

“Aku meri terima kasih ngagai Komiti Mit Rantai Bekal Pemakai betuaika Datuk Amar Awang Tengah Ali Hasan ke mega Sapit Kepala Menteri enggau Datuk Seri Fatimah Abdullah, kaunsil pelilih menua, Komiti Penyanga Penusah Bagi Menua, Tuai Raban Bansa, JKKK, NGO enggau mensia semua ejensi perintah besai enggau Perintah Nengeri bakaul baka Polis Diraja Malaysia (PDRM), Raban Soldadu Malaysia (ATM), Opis Menteri Dagang Dalam Menua enggau Pekara Penguna ngguna (KPDNHEP) Sarawak, Opis Bomba enggau Penyah Penusah Sarawak enggau ke bukai laban udah bebendar ngelawa palan ke jauh endur nyuaka bantu,” ku iya.

Ku iya, pengawa nganjung pemakai tu mesti nitihka SOP PKP Covid-19.

Nangkan ke nya, iya bisi ngabas palan meri vaksin enggau Sepital Tambah ATM di Kapit.

Ku iya, Sepital Medan tu dibuka enggau didirika Raban Soldadu, nyendiaka 40 pangking endang keterubah iya bisi ba Sarawak,

“Kitai meri terima kasih ngagai ATM laban udah mantu nyendiaka perengka guna tu.

“Ba pelilih Kapit, bisi tiga PPV ke ulih muat 350 ngagai 400 pesakit ninting hari,” ujarnya.

Taja pia, ku Abang Johari, Perintah Sarawak udah ngasuh raban komiti ngelawa sitak menua pesisir.

“Bisi 11 tim komiti udah digerah ngagai pelilih Song, Kapit, Bukit Mabong enggau Belaga.

“Tim komiti tu mega udah digerah ngagai sitak menua pesisir,” ku iya.

Ngelansa pasal pengawa ngempang jalai ray (SJR) di Kapit, ku iya bisi dua agi palan ngempang jalai ditambah, dua ba Song enggau dua di Belaga.

“SJR tu beguna dikena nentuka SOP bekaul enggau pejalai komiti enggau atur pejalai dititih,” ku iya.

Suara Sarawak