Bantu pemakai berengkah disadung 4 Februari di Kapit enggau Song

KUCHING: Perintah Sarawak deka berengkah nyadung bantu pemakai ngagai 16,000 ruang bilik di Kapit enggau Song ke tepekul ketegal Atur Mindah Betagang (PKP) kena 4 Februari.

Sapit Kepala Menteri Datuk Amar Awang Tengah Ali Hasan madah, pengawa nya mungkur empat Dun nyengkaum Pelagus, Katibas, Bukit Goram enggau Belaga (Nanga Merit).

“Genap ruang bilik deka nerima bantu pemakai berega RM70 diberi sekali lalu agih belanja ungkup pengawa manggai RM1.42 juta nyengkaum ungkus perengka pengangkut.

“Baka di Sibu, pemakai ke diberi nya berau, gula, tepung, pemakai dalam tin, the, kupi, minyak makai, biskut enggau mi,” terang iya.

Awang Tengah ke mega Chairman Komiti Rentayan Bekal Pemakai Covid-19 mansutka jaku nya rambau aum pemberita ditu, tadi.

Ku iya, belanja deka diberi ngagai Komiti Penyangga Penusah Renggat Bagi Menua Kapit lalu disaup Komiti Penyangga Penusah Pelilih Kapit enggau Song.

Suara Sarawak