Bantu pemakai RM5.1 juta diagih di Sibu

SIBU: Perintah Sarawak ngagihka belanja RM5.1 juta ungkup bantu pemakai ti disadung ba Bagi Menua Sibu.
Kepala Menteri Datuk Patinggi Abang Johari madahka bantu pemakai disadung beduduk ari Bagi Menua Sibu diteritka Atur Mindah Betagang (PKP) pengelama dua minggu berengkah ari 16 ngagai 29 Januari tu.
“Bagi Menua Sibu mungkur tiga pelilih nya Sibu, Selangau enggau Kanowit sereta 11 sitak Dun.
“Berindik ari PKP diterit ba Bagi Menua Sibu, Perintah Sarawak nengah Komiti Mit udah baum kena 18 Januari tu tadi ngambi ngelangkar strategi nyadung bantu pemakai ngagai peranak ba Sibu ti diteritka PKP ngambi nagang kes positif Covid-19 ke majak nambah,” terang Abang Johari.
Abang Johari mansutka jaku nya ba sebengkah penerang pasal Program Bantu Pemakai ungkup rayat ba kandang menua diteritka PKP ba Sibu ngambi nagang pandemik, ditu tadi.
Nambahka nya ku iya, bisi 73,000 tuai bilik (KIR) ti diteritka PKP nitihka penerang tumu ari Komiti Penyangga Penusah Bagi Menua (JPBB) Sibu.
“Ba renggat bagi menua, JPBB Sibu deka bekerejasama enggau pegawai pelilih, ketuai komuniti enggau ketuai raban bansa/kapitan, JKKK enggau gerempung ukai dikuasa perintah (NGO) ngambi ngelala KIR ti begunaka bantu pemakai.

Suara Sarawak