SARATOK: Tating belanja ruang bilik ke bisi anak mit berasai lempung endar pengudah nerima bantu tusu tepung.
Sapit Menteri Pengeluar Kuasa enggau Pengeraja Asal, Ali Biju diarika Tim Ali Biju ari Palan Servis Komuniti Sitak Parlimen Saratok nampung baru Program Bejalai Nyadung Bantu Tusu Tepung tu.
Kebendar ku Ali, iya sinu lebuh betatika penusah ditapi rayat kelebih agi sida ke bisi anak mit ke benung mekang tang nyau putus pengawa tauka nadai ulih nurun begigaka belanja.
“Kitai sama nemu, pemalat empas ari pandemik Covid-19 tu tadi lalu diatu datai ba renggat penyuman, taja mayuh sektor ekonomi udah dikemendar gawa tang ukai semua pengawa ulih dikereja.
“Ari nya, kitai meretika apai indai suntuk belanja dapur nyengkaum pemakai bala anak baka tusu tepung lebuh putus pengawa. Tambah mega, bala anak ukai nemu utai ke nadai.
“Nengah bantu tu mih aku nyaup ngelempungka mimit tating belanja ti nepan sida. Sinu lebuh betatika mua bala anak mit,” ku Ali mantaika penyiru diri lebuh dirandau Suara Sarawak.
Raban betubuh enam iku betuaika Rosta Mon niki ngagai Rumah Ambrose Ambu, Lubok Kepayang ditu mupuk ngatur pejalai kena 23 September tu tadi.
Bisi 29 ketuai ruang bilik ba Rumah Ambrose udah nerima bantu tusu tepung nitihka rintai penerima ke udah dirikod.
