Bantu ungkup deriba e-hailing kelai penyinu perintah

KUCHING: Pemutus perintah ngungkupka RM500 ti deka diberi enggau chara ‘one-off’ ngagai sida ke deriba grab siti pemutus engkeman sereta ngelantangka ati.

Ba Jacksua Renggan Geraman iya ngasaika pemutus perintah nya pemutus ke endang dianti lebih agi sida ke tejanggal mai grab di serata menua jam ke diatu ketegal pengerekai igi penyakit Covid-19 lalu ditangkan Atur Tagang Pejalai (PKP) ke dilanjar nyentuk 14 April.

Iya madahka diri berasai temegah ati enggau pemutus ke udah digaga Menteri Besai nya.

Tu ku iya, deka ngelempungka agi tating belanja ke ditapi sida baikka ba Semenanjung Malaysia enggau Sarawak tu empu.

“Terima kasih ngagai Menteri Besai kitai laban iya udah mantaika penyinu ngagai raban kami.

JACKSUA RENGGAN

“Pia mega ngagai bank laban udah besetujuka bayar lon kerita diketuka dulu maya jam diatu,” ku iya madah ngagai pengarang berita maya dipinta meri penemu sentang pekara nya, kemari.

Menteri Besai (PM) Tan Sri Muhyiddin Yassin lemai ensana netapka bantu RM500 deka diberi enggau chara ‘one-off’ ngagai 120,000 sida ke mai e-hailing nengah Pakej Nyungkak Ekonomi Sinuka Rayat (Prihatin).

Muhyiddin madahka raban tu patut bendar ditulung laban diatu benung ditating penanggul ari pekara belanja bepun ari PKP dipejalaika.

Henry Phua Chia Chiang bela sepenemu enggau Jacksua alai iya ngasaika perintah menua siru sereta betatika penusah enggau penanggul ke ditapi rayat.

“Terima kasih ngagai perintah menua Malaysia laban beratka pengidup rayat nyengkaum kami di Sarawak ditu.

HENRY PHUA

“Bantu tu beguna bendar dikena kami ngelempungka agi tating belanja sekumbang timpuh PKP diatu,” ku iya ke gawa penuh deriba Grab.

Henry madahka bantu nya deka dikena iya bebelika barang ke patut lebih agi barang pemakai sekumbang PKP diatur tu.

Saum penemu enggau seduai, Rody Christie Michael Ngauh siku ari sida ke mai grab di Sibu ngasaika bantu nya besai amat reti ngagai iya.

Nambahka maya diatu ku iya, servis sida enda dikena ketegal PKP lalu besai amat meri ubah ngagai penatai pemisi sida sebilik.

“Baka aku ti semina bepanggai ba pengawa mai grab endang berasai amat maya jam diatu laban nadai orang bekenaka grab.

Rody Christie Michael Ngauh

“Tu jauh bida enggau sida ke mai grab tang bisi batang kereja.

“Aku mayuh utai kira, suwa rumah, belanja ruang bilik lebih agi bayar lon kerita amat mih bisi moratorium ari bank tang enti enda dibayar nyau dua bulan tauka lebih ari nya endang sigi dibayar baka selama,” ku iya madah.

Iya mega nangi bendar PKP dilanjarka agi ketegal penyampau kes COVID-19 majak nambah nyentuk bulan April tu.

Siku agi deriba Grab Joanester Gaing madah pakej dibantai Menteri Besai tu chukup meri pengaga laban beratika penusah penyuntuk ke benung ditapi semua deriba e-hailing sekalinya gawa penuh tauka nyambil aja.

“Aku chukup beterima kasih besai ke inisiatif ti mungkur semua rayat baka tu,” ku iya.

JOANESTER GAING

Suara Sarawak