Baru nyukung penuh chalun Menteri Besai ari Borneo

KUCHING: Kaban Parlimen Selangau Baru Bian madah udah datai maya pangku pengawa Menteri Besai (PM) diarika peranak ari Borneo.

Nya alai, iya nyukung penuh perambu Tun Mahathir Mohamad ti mantaika nama Presiden Warisan Datuk Seri Shafie Apdal nyadi chalun Menteri Besai Malaysia ti kesemilan

“Tu seriris enggau pekara Perintah Besai menua ti madahka ketuai ari Sabah enggau Sarawak mega bisi hak ti sama enggau di Semenanjung Malaysia nyengkaum dichirika nyadi Menteri Besai.

“Nyirika Shafie deka ngamatka semaya sereta nyadi tanda ngagai sida tuai kelia lebuh setuju numbuhka Malaysia,” ku iya dalam siti penerang sehari tu.

Iya ti mega Adun Ba’kelalan madahka Shafie endang siku orang politik ti bepenemu sereta ngembuan parti politik ti kuat ba Sabah.

“Iya endang engkeman ngempu pengawa nya lalu sida ketuai Pakatan Harapan (PH) patut meri sukung ngagai perambu tu dikena mutarka penanggul milih chalun Menteri Besai,” ku iya.

Tandu iya, siti ari syarat dalam Kontitusyen Perintah Besai, orang ti engkeman dichiri Yang di-Pertuan Agong nyadi Menteri Besai endang siku orang ti ‘patut bulih penyampau majoriti’ nitihka Artikel 43 (2) (a).

Nya alai, kenu ku iya, ngembuan Menteri Besai ari Sabah deka meri pengaga ati ngagai rayat Sabah enggau Sarawak lalu tau mantu muai pemenchi orang Sabah enggau Sarawak ngagai Semenanjung ketegal dichiping Perintah Besai ngelama tu.

“Pekara ti ayan ari Sempekat Malaysia 1963 mega mutang agi diputarka nyema Shafie megai Perintah Besai.

“Aku ngarapka ketuai Gempung Parti Sarawak (GPS) meri sukung ngagai Shafie nyadi Menteri Besai laban tu tau meri peluang endur kitai madah ngagai dunya iya nya kitai endang bakih ti seikas dalam Perintah Besai ukai petungal kedua,” ku iya.