Basa ngenegap kaul serakup pupu bansa

ROBAN: Komuniti China ditu berasai lantang nerima sukung enggau kerejasama rat ari pupu bansa lebuh bejalaika pengarap sida.

Sapit Ketuai Pampang PKR Saratok, William Barang ti datai ngarika MP Saratok, Ali Biju, malam nya madahka diri temegah ati mega peneguh kaul rayat ti bebasaka jalai pengarap pangan diri.

“Pengari rayat kitai enda ulih datai ketegal ngulu aum parlimen lalu aku ngemai pesan lantang enggau berita manah ungkup komuniti China kelebih agi ngagai Tua Pek Kong Roban.

“Kebuah pia laban Ali Biju udah ngemendarka agih belanja penyampau RM10,000 dikena bala kitai ngatur pengawa pulaika pemaik semua,” ku William lebuh nyuaka pemeri nya ngagai pengari komuniti penerima.

Sama datai ngerichahka pengerami lemai nya Pemantu Khas MP Saratok, Glenn Anthony disempulang bala kaban PKR Saratok sereta rayat pupu bansa.

Peneguh kaul pupu bansa tu asil ari pemereti ati enggau basa lebuh begulai enggau pangan diri sereta ngasika ajar sida ke tuai ti dekaka semua kitai idup bebaik, ku William nandu.

RICHAH… Pupu bansa meri sukung ngagai komuniti China di Roban bejalaika pengarap sida.