KUCHING: Komiti Besai Penerebai Malaysia (MAVCOM) enda matau tikas tambang bilun ba menua tu laban rega tikit ditentuka kuasa makit.
Chairman Eksekutif iya, Datuk Seri Saripuddin Kasim madah, sida nemu pasal isu rega bilun ti tinggi ungkup penerebai ke Sabah enggau Sarawak kelebih agi maya musin pengerami Kaamatan enggau Gawai.
Nya kebuah ku iya, Perintah Besai udah meri subsidi tambang bilun ari Semenanjung ke Sabah enggau Sarawak penyampau RM300 maya musin nya nentuka mensia mayuh pulai ngagai nengeri sida.
“Pia mega, inisiatif FLYsiswa Opis Menteri Pengangkut mega nyendiaka baucher RM300 dikena meli tikit bilun ngagai nembiak ti rejister ba institusyen pelajar tinggi perintah di selampur Malaysia.
“Baucher nya ulih diambi sekali tauka beberapa meli tikit bilun nyentuk 31 Disember taun tu enggau timpuh pejalai nyentuk ujung bulan March 2024.
“Tu entara inisiatif dipejalai perintah ngurangka tambang bilun enggau nentuka mayuh agi orang pulai ke rumah maya musin pengerami tauka kemisi,” terang iya.
Ku iya, MAVCOM enda ulih matau tambang bilun tang meransang pengawa besemekih dalam industri penerebai, nambah penerebai sereta standard nyaga penguna penerebai.
“Komiti besai mega diberi kuasa ngadu skim Kewajipan Perkhidmatan Awam (PSO) dalam industri penerebai di Malaysia.
“Seraya perintah besai kelebih agi Opis Menteri Pengangkut mengkang nyadi orang ti ngaga polisi besai.
“Di baruh sempekat PSO ti disain enggau perintah ba bulan Januari 2019, MASwings matau 30 arung Servis Langit Luar Mengeri (RAS) di Sarawak ari taun 2019 ngagai 2024,” ku iya.
Ngelansa silik, ku iya, pengudah sempekat nya abis 2024, sida deka bejalaika latih rasionalisasyen ngambi berati baru arung nya.
“Kami benung matau nambah dua agi STOLport baru tang apin ditetapka agi.
Nya kebuah aku enda ulih madahka palan nya,” ku iya.
Ngelansa pasal ungkus operasyen RAS, ku iya, nya ditangguh perintah besai ari sukut subsidi enggau bayar bilun.
Sama datai Tuai Pegawai Operasyen (COO) MAVCOM Raja Azmi Raja Nazuddin, Direktor Pemansang Penerebai, Jaffar Derus Ahmad, Direktor Penguna enggau Mensia Mayuh, Pushpalatha Subramaniam enggau Menijar Kanan Pemansang Penerebai, Karen Leiking.
