Bayar lengkas chukai lima peratus

“Semina Petronas aja ke bedau mayar alai kitai meri timpuh ngagai pengujung bulan Oktober. Enti enda, kitai deka ngeluarka saman lalu Sarawak udah sedia.”

KUCHING: Kompeni minyak menua, Petronas dipinta mayar chukai lima peratus ari asil minyak enggau gis ke dipansut ari Sarawak enggau lengkas.

Menteri Nembiak enggau Lumba Datuk Abdul Karim Rahman Hamzah madah Petronas diberi timpuh ngagai pengujung bulan Oktober 2019 alai undang-undang bekaul enggau chukai nya udah diterit kenyau bulan Januari 2019.

Ku iya, enti mengkang enda dibayar dalam timpuh ke ditetap, Perintah Sarawak deka ngeluarkan saman ngagai Petronas.

“Kompeni minyak ke bukai baka ke Shell enggau Murphy Oil udah mayar.

BEJADI…Karim malu tawak kelai bejadi Pesta Burung Asia Ke-10 di Waterfront Kuching kemari.

“Semina Petronas aja ke bedau mayar alai kitai meri timpuh ngagai pengujung bulan Oktober. Enti enda, kitai deka ngeluarka saman lalu Sarawak udah sedia,”ku Karim enggau nyemetak.

Iya mansutka jaku nya ba aum pengarang berita pengudah bejadi Pesta Burung Asia Ke-10 di Waterfront Kuching ditu, kemari.

Karim nambah, Sarawak enda ulih nganti lama agi ketegal pekara nya udah ditangguh kelalu lama.

Petronas ku iya bisi minta ditangguh ngagai tengah taun 2019 alai pinta nya disetuju Perintah Sarawak.

“Kompeni minyak bukai bebasaka undang-undang tu lalu udah mayar.

“Enti enda dibayar retinya udah ngereja penyalah, undang-undang udah terang alai kitai ulih ngeluarka saman,”ku Karim.

Enda lantang enggau dalih Petronas, Karim ngenataika tanya ‘Sapa Nuan ?’ ngagai kompeni nya.

Ku iya, kompeni nya patut enda lebih agi ari Sarawak ke nyadi negeri pemansut minyak enggau gis.

“Kita enda ulih besai agi ari Sarawak, kita semina siti kompeni,”ku Karim ke mega Menteri Dagang Temuai, Seni enggau Main Asal.

Pesta Burung Asia Ke-10 di Kuching diatur berengkah 27 September nyentuk ngagai 1 Oktober 2019 lalu digulu penyereta ari lebih 24 bengkah menua.

Entara menua ke nganjung penyereta iya nya Kemboja, Australia, India, Kenya, Nepal, Panama, Peru, Filipina, China, Taiwan, Singapura, Jepun , Hong kong, Amerika enggay sekeda ke bukai.

Program ke bisi diatur rambau pesta iya nya forum eko-antarabangsa, licha, program ungkup nembiak sekula sereta pengawa mandangka pekara ke bekaul enggau burung ari lebih 70 penyereta.

Suara Sarawak