SARATOK: Pejalai pengawa nyeleti enggau ngemanahka sekula repuk di Sarawak ulih dipejalai enti pinjau dibayar Perintah Sarawak ngagai Opis Menteri Wang nitihka jaku sempekat.
Ku Ali, iya dipadahka ke alai Perintah Sarawak udah setujuka pemutus Perintah Besai ke alai agih belanja RM1 bilion ari Perintah Sarawak dikena mayar utang.
“Bayar tu patut dipasuk ke akaun Kumpulan Wang Disatukan di Opis Menteri Wang Malaysia seriris enggau Konstitusyen Perintah Besai (PP) Perkara 71 (1).
“Pemutus tu asil ari randau entara Menteri Pelajar Maszlee Malik enggau Kepala Menteri Sarawak Abang Johari Tun Openg ti udah diatur kena 24 April 2019,” ku Ali madah nyemetak.
Status penerang pasal agih enggau pejalai belanja RM1 bilion dikena mutarka penanggul sekula repuk di Sarawak nerima timbal manah ari Perintah Besai.
Kaban Parlimen Saratok Ali Biju mantaika pekara tu ba Aum Parlimen Kedua, Penggal Kedua Parlimen Ke-14 ti minta Menteri Pelajar madahka status pemadu baru sentang belanja nya.
Nya kebuah ku Ali, Opis Menteri Pelajar Malaysia (KPM) patut nganjung peminta baru agih belanja nyeleti enggau ngemanahka sekula repuk di Sarawak.
“Belanja tu dipinta nengah peminta bajet ninting taun di baruh Agih Belanja Pemansang (DE).
“Lalu agih belanja penyampau RM1 bilion tu dikumbai ‘over and above’ ari belanja nyeleti sekula repuk ke bisi diatu,” ku Ali nitihka saut opis menteri nya.
Ali nandu nyemetak ke alai pejalai pengawa nyeleti enggau ngemanahka sekula repuk di Sarawak ulih dipejalai enti sempekat dipebasa lalu Perintah Sarawak ulih mayar pinjau ngagai Opis Menteri Wang.
Nya alai Ali ngarapka pekara tu ulih nyapai sempekat enggau diputar memanah nengah lebas penemu ti berundingka pemesai guna pelajar ngagai menua tu enggau rebak dudi.
“Kitai andal amat kededua piak, Perintah Besai enggau Perintah Sarawak, deka muka runding lalu ngempung penemu ti pulaika pemaik enggau pengelantang rayat di menua,” tandu Ali seraya nambah pekara pengelantang rayat nyadi pekara dikemerat sida ti udah dipadu nyadi ketuai diatu.
