KUCHING: Kaban Kunsil Nengeri (ADUN) Ba’Kelalan, Baru Bian madah ke pengirau diri pasal bayar RM100 ba peminta status peranak asal (Bumiputera) Sarawak.
Ku iya, bayar nyampau nya ka kelalu mar lalu tau endar nating orang ti endang ditemu begunaka dokumen nya enti sida nya sebilik mayuh tubuh.
“Tu mega tau endar nekul rayat Sarawak ti endang patut minta status peranak asal menua kitai.
“Bayar RM10 pan udah jelan iya laban enggaika perintah dipeda beambi ulih ari rayat ti begunaka hak nya ngambi diaku nyadi rayat menua tu,” ku iya ba sebengkah penerang tadi.
Baru mega irauka pengawa ngaduka peminta nya engka bisi penanggul ba birokrasyen enggau tating belanja ngagai rayat ti kelalu lama nganti pekara nya diputar.
Iya madah, atur peminta ngaul Opis Peliluh enggau nganti Sekretari Nengeri sereta komiti iya deka ngasuh pengawa laun tauka lama diadu.
“Kebuah pia laban Sekretari Perintah Nengeri mayuh pengawa dikereja lalu ukai bisi mayuh awak lepa kelimpah bisi tanggung pengawa bukai ti besai agi.
“Nya alai aku minta peminta tu diaduka pegawai pelilih ba renggat pelilih menua tauka pegawai pengatur pengawa enggau ngena dokumen diaku ti nyukung peminta enggau ngena bayar abis mudah sereta dikemendar enggau jampat.
“Aku pechaya pengawa ngaku status peranak asal tu patut digaga enggau muntang, lalu pegawai pelilih tauka pegawai pengatur pengawa orang ti engkeman endar ngaduka pengawa tu,” terang iya.
Baru ngena peluang nya meri terima kasih ngagai Sapit Menteri ba Opis Premier Sarawak (Undang-Undang, MA63, enggau Kaul Nengeri-Perintah Besai) Datuk Sharifah Hasidah Sayeed Aman Ghazali ti udah nerang pasal isu ngaku status peranak asal (Bumiputera) Sarawak.
