Bayar saman setengah rega

BINTANGOR: Mensia mayuh diperansang ngerebut diskaun 50 peratus bayar saman dipejalaika raban Polis DiRaja Malaysia (PDRM).

Ketuai Polis Pelilih Meradong, Deputi Superitendan Polis (DSP) Sekam Anoi madah, diskaun pengelama 18 hari nya berengkah ari 25 March nyentuk 11 April 2021.

Ku iya, tuju meri diskaun setengah rega nya endang meri peluang ngagai mensia mayuh mayar saman sida nengah portal enggau aplikasyen dalam tali arus, MyBayar Saman.

“Portal tu pelasar pemadu beguna ti deka ngemuntangka mensia mayuh meresa status enggau bebayarka saman sida.

“Bayar setengah rega tu beserimbai enggau pengerami ngintu Hari Polis Ke-214, kelai pemanah kaul entara raban polis enggau mensia mayuh,” ku iya ba sebengkah penerang, tadi.

Suara Sarawak