Bayar utang PTPTN enggau naka ulih – Fadillah

KUCHING: Raban ti kala minjau ari Wang Turu Pelajar Tinggi Nasional (PTPTN) patut naka ulih mayar utang sida kelimpah bisi ketegal ti enda ulih diseliah, ku Kaban Parlimen Petra Jaya Datuk Seri Fadillah Yusof.

Fadillah madah, taja pia pengulih raban peminjau dalam mayar utang patut dulu diperunding sebedau ngukum sida.

Iya madah munyi nya ngagai pemberita rambau ngulu Program Cahaya Gawai Aidilfitri ti diatur Gerempung Nembiak Nasional Sarawak (Saberkas) pampang Samariang ba palan bebeli barang ditu, kemari.

“Ngagai sida ti udah tembu besekula ti benung ngiga kereja tauka baru gawa lalu gaji agi bedau chukup, sida patut dikelaung dulu ari kena ukum.

“Sida ulih dikelaungka tauka bisi chara bukai baka netapka atur seriris enggau pemisi sida,” ku iya.

Fadillah madah, bagi orang ti berutang patut meseti ngempu tanggungpengawa mayar pulai baru duit pinjau kena nepu baru tabung PTPTN.

“Ari sukut prinsip, enti udah berutang kitai meseti mayar utang nya baru.

“Laban lebuh kitai mayar pulai baru duit ti dipinjau nyadi nembiak sekula bukai ulih minjau duit ari PTPTN kena besekula ba universiti dudi ila,” ku iya.

Iya ngasuh piak perintah besai Pakatan Harapan (PH) ngaga altenatif baru baka ‘artificial intelligent’ (AI) ti lebih efisyen dikena nyidi pengulih raban peminjau mayar pulai duit PTPTN sida.

Dulu ari nya, PTPTN madah sida sedia berunding deka meri insentif ngagai raban peminjau dikena nentuka proses ngumpul utang lebih ngasi.

Suara Sarawak