ARTIKEL

Bayu Harvest Aplikasyen digital mantu pekebun moden

Facebook
Twitter
LinkedIn
WhatsApp
Telegram

TEKNOLOGI digital udah muka mata enggau runding kitai senentang pemesai guna teknologi pemadu baru ti udah ngubah semua pengawa nyadi muntang.

Pengelebih teknologi digital tu udah muka siti jalai besai enggau jereki ngagai semua kitai kelebih agi pedagang enggau pemekuh industri.

Berindik ari nya, teknologi digital mega nyaup kitai nyingkang jauh agi baka menua moden enggau maju bukai.

Pandemik COVID-19 tu udah meransang kitai ngerumban pejalai nyingkang nuju Revolusyen Industri 4.0 (IR 4.0) nipakka peneras arus pemansang dunya.

Ambika banding, e-wallet enggau randau online baka Zoom sereta Google Meet suah diguna ngambi kitai enda begempuru lebuh baum dikena ngerintas rantai COVID-19 lebuh nya.

Inovasyen meseti dikemanah ngambi mutarka pemar lalu ulih mulaika pemanah penyungkak ekonomi.

Lebuh ngenang baru penguji besai ditapi berapa taun ti udah ketegal pengerekai COVID-19 tentu kitai deka beterima kasih laban diberi peluang ngasaika infrastruktur manah nentuka pemujur pemansang baru dalam ekonomi digital dudi hari.

Ba jeman IR 4.0, penerang digital enggau data besai (Big Data) nyadi kereban sanding nyungkak ekonomi baru beduduk ari gaya idup digital, mensia nadai bekenaka mata duit lebuh bebayar, dagang nengah aplikasyen, menua pintar enggau servis nengah online magang.

Ekonomi digital diatu ngembuan besai guna enggau empas iya, ukai semina ba Asia Tenggara tang mega ba serata dunya nentuka pemansang ekonomi lanchar enggau disungkak belama.

DAGANG TIKAS ANTARABANSA

Pemayuh transfomasyen digital ba Asia Tenggara majak maju beduduk ari penumbuh serikat teknologi besai baka GoJek, Grab, Lazada, Sea, Tokopedia enggau Traveloka.

Semua serikat nya endang ngerandang dagang diri dalam ekonomi digital nipakka arus pemansang dunya.

Nya kebuah, semua pemansang tu narit perati perintah menua serantau ngelangkar bemacham strategi nyungkak sektor ekonomi digital.

Nampung pasal ekonomi digital, penerang ti deka dikunsi sekali tu ditibak ari vulcanpost.com pasal pemujur Bayu Harvest menang APEC App Challenge di Chile dalam taun 2021.

Pandemik tu ngujungka mensia mayuh diasuh diau ba rumah enggau nyumai kediri sereta meri pengelebih ngagai pekebun nambahka penatai pemisi laban mayuh peminta dagin enggau sayur.

“Pengawa numbuhka Bayu Harvest tu dikena ngelakuka produk bala pekebun.

“Tu mega sebagi ari chara kami mantu pekebun ngambi nerima asil mayuh agi enggau ngerandang jalai ngagai sida nyerungkai ekonomi digital.

“Kebuah pia laban ekonomi digital diatu ngembuan seribu satu pengelebih ukai semina ungkup pemekuh industri enggau pedagang tang mega ngagai mensia mayuh,” ku siku ari Pemungkal Bayu Harvest, Jeannette Goon.

Bayu Harvest tu nyadi pelasar mantu pekebun ba Sabah ngerembaika produk sida ngagai makit ke besai agi tauka ba restoran.

Ari pelasar nya, mensia mayuh lebih ngelala pekebun ti betanam nya seraya nambah penatai pemisi sida.

BAYU HARVEST

Konsep Bayu Harvest tu asil buah runding pintar Jeannette Goon enggau Faezrah Rizalman ba Kerjasama Ekonomi Asia Pasifik 2019 Apps Challenge di Chile.

Faezrah madah, pekebun ba Sabah suah nyual asil sayur sida ngagai orang tengah enggau rega murah.

Pekara tu ngujungka bala pekebun nadai bulih untung besai ari asil betanam nya laban sayur dijual enggau rega murah.

Nya alai, Bayu Harvest ngena peluang tu mantu pekebun ngerandang jalai ngambi produk sida ulih rembus ngagai makit ke besai agi sereta bulih untung besai.

Naka tu, seduai udah mantu 100 pekebun ba lima genturung pendiau di Sabah.

Aplikasyen tu mega muntang dikena laban nadai begunaka arus penyambung ti deras.

Nya alai, pekebun ba menua pesisir muntang nguna aplikasyen tu endur ngelakuka utai tanam sida.

Tebal agi, pekebun dia endang sedia nguji ngelakuka asil tanam sida lalu Faezrah enggau bakih iya sedia ngiri penemu enggau ngembing sida dataika mujur.

NGEMBING

Ku Faezrah, tim Bayu Harvest deka ngiri penemu ngagai bala pekebun.

“Kerejasama enggau pekebun muntang dipejalai laban bala anak sida nemu bekenaka teknologi baru tu.

“Ketegal pandemik tu, bala pekebun mesti berundingka chara baru baka mantaika produk sida nengah marketplace lalu kami mantu sida ngelakuka produk nya nengah Bayu Harvest,” terang Faezrah.

Nengah pelasar tu, produk sida baka sos plum enggau lada chelum sereta lada bukai ari bala pekebun.

Bala pekebun deka diintebiu dulu sebedau ngelakuka produk sida nengah pelasar tu.

Kebuah pia ngambi tim Bayu Harvest meresa dulu produk ti deka dijual sida enggau pemayuh sereta peminta produk nya.

Udah nya, tim Bayu Harvest deka berandau enggau pekebun sentang peminta enggau rega produk dijual sida.

KEREJASAMA

Pemujur Bayu Harvest ba tikas antarabansa tu kelai pemanah kaul kerejasama entara pemungkal, tim Bayu Harvest enggau bala pekebun.

Bayu Harvest ti nyadi champion ba tikas antarabansa tu asil kerejasama enggau gerempung ukai dikuasa perintah (NGO) iya nya The Asia Foundation (TAF), Google sereta embing enggau sukung ari organisasyen APEC empu.

Berambaika jaku ari APEC empu nya, Bekunsika Jereki, Faezrah andalka Bayu Harvest tu pelasar ke manah ngerandang jalai ngagai bala pekebun ngambi angkat dalam industri betanam betupi ukai semina ba tikas menua tang mega ba tikas antarabansa.

“Bekunsika jereki tu mai reti semua orang patut dibantu ngambi angkat dalam genap pengawa dikereja,” ku Faezrah nerang baru.

Nambahka nya ku Jeanette, teknologi tu mega ngemuntangka pengawa sida mantu bala pekebun.

EKONOMI DIGITAL

Dua pemungkal nya mega madahka Bayu Harvest naka ulih mantu bala pekebun ke alai seduai enggau tim bukai ngelawa pekebun, berandau, ngembing enggau ngajar sida pasal pelasar tu.

Lebuh numbuhka pelasar nya maya Pekit APEC tu, Faezrah madahka sida sebuat belajar baka ni ngelakuka produk enggau makit ke nerima mayuh peminta.

Pekit App APEC tauka dikumbai The APEC App Challenge nya deka ka sida mutarka penanggul ditapi peranak menua kelebih agi pekebun.

Taja pia, orang bukai ti masuk pekit nya mandangka mesin ti dipatau ngena teknologi moden.

Nya kebuah, pemujur Bayu Harvest tu berindik ari pengelebih dikembuan sida kelimpah pengeran mantu komuniti.

BERITA LAIN

BERITA TERBARU