Bedaja pun penatai belanja Madeline

MIRI: Terung Iban, cangkuk manis enggau sirih bungai entara sayur nyadika pun penatai pemisi sida ti bedaja di Emart Tudan ditu.

Macham bansa daun babas enggau sayur idup bisi dijual ditu ngasuh tamu tu ditapatka mensia mayuh.

Madeline Tangain, 48 taun, ti bedajaka daun babas madahka utai daja iya dibeli ari pemekal lalu ke bukai ditanam iya empu di kebun.

Iya berengkah ngaul diri ba pengawa tu pengudah siku ari sida sebilik minta saup iya bedaja.

“Iya ngetu bedaja laban bisi kebuah bukai lalu aku nampung pengawa iya nya.

LAKU… Bala pengusung meli sayur ari Madeline.

“Tebal agi sayur ti dijual aku datai ari daun babas ti suah ditapatka bala pengusung,” ku iya lebih dirandau Suara Sarawak.

Madeline madahka diri udah tujuh taun bedaja dia lalu milih sayur laban sedarka pengulih dagang nya kelimpah rinduka pengawa bedaja.

“Ba aku empu, pengawa tu ngemai untung besai enti dikereja enggau ati lurus sereta puh kelimpah chara ti betul.

“Ambika chunto, maya musim pengerami, untung bisi manggai RM1000 lebih sehari lalu lebih RM100 sehari enti hari bukai,” ku iya.

Ku iya, bisi rikod digaga iya nentuka bagi sayur ti nerima peminta tinggi, bisi maya nitihka timpuh enggau musim kemisi sereta pengerami.

DAJA… Bangsal sayur Madeline Tangain.

“Enti hari bukai, untung tau dikumbai chukup makai, ulih dikena nampung belanja bedagang,” ku iya madah silik.

Nentuka pemujur, kitai bedaja patut nemu nipakka dagang diri sereta beratika gaya peminta mensia mayuh.

“Baka nya mega musim pengerami, aku bekerejasama enggau sida bedaja bukai, begintir nyual enggau nyaga mija.

“Ari kerejasama tu, kitai ulih bedaja enggau ati lantang, ulih ngambi kemisi sereta enda irauka dagang diri diketu enda lama maya kemisi,” ku Madeline nambah.

Kelimpah ari nya, iya mega bisi meli sayur Sabah ti nadai di Sarawak.

“Aku suba kala nemuai ke Sabah lalu ngena peluang nya meda bagi sayur ti tau dibai enggau dijual ditu.

“Asil iya jauh manah sereta nerima peminta tinggi ditu,” ku indai empat iku anak.

Nya kebuah ku iya, bekal sayur ari sabah udah abis lalu nganti bekal ke baru datai enda lama agi.

Entara sayur ari Sabah baka rampu Sabah, sayur kailan enggau kuchai.

NYELAI… Sirih bungai nerima peminta tinggi.

Suara Sarawak