Beduruk, beserakup nyapai pemansang

Lebuh agi mit suba sigi dianti-anti musin orang bumai. Pengawa ke pemadu dikerindu maya bumai tu iya nya jam orang nugal.

Nama kebuah rindu? Laban maya tu mih peluang begagai, bemain sebelah tegalan laban ke dibai apai indai bemalam ba langkau umai.

Macham utai ulih dikereja nyengkaum nginti iya nya pengawa ke balat ngasuh rindang maya nya suba.

Maya tu mega sekayu rumah panjai ngereja umai enggau duruk, bepun ari pengawa nebas, mantun, nugal, ngetau enggau berangkutka padi pulai ke rumah.

Diatu nyangka ketegal kitai di rumah panjai nyau jarang bumai tauka nyau kiruh ngereja pengawa bukai baka bekebun lada enggau betanamka sawit.

alvester bigol columnist

Nyadi pengawa beduruk bisi rapas mimit dipeda. Tang taja pia pengawa tu meruan dipeda maya bisi pengerami besai tauka penusah rabat.

Reti jaku beduruk nitihka penerang dalam kamus iya nya pengawa besaup nulung pangan diri nyentukka pengawa ke dikereja nya tembu.

Pengawa beduruk endang adat ke chukup manah dikereja enda ngira sekalika nya ba rumah panjai tauka ba endur bukai laban nya lambang penyerakup ti nyata.

Endang amat laban semua orang ke di baruh perabung nya semampai begulai manah, segulai sejalai, betulung mantu pangan diri maya tusah, maya renga pedera.

Ukai semina napi penusah enggau penanggul aja, Pengawa rami baka pengerami nikah, begawai enggau mayuh agi pengawa bukai endang dikereja chara begulai beripai magang.

Kaul ba rumah panjai

Uji kitai beratika kaul entara rumah panjai sebuah enggau rumah panjai sebuah. Diatu kaul nya kebendar agi tubah rat laban lebuh bisi penusah rabat. Semua kaban belayan baik nya jauh tauka semak bela dikangau datai.

Tuju tu ukai semina dikena kitai meri basa ngagai orang ke udah nadai tang mega bela besaup ngulur sesen dua ngagai ruang bilik orang ke rabat.

Pia mega megal lebuh bisi penusah ke bukai. Pengawa nulung ngesah pangan diri tu tau dikumbai kitai beduruk.

Kitai agi nulung enggau tulang enggau hari, mantu ni utai ke ulih kereja kitai. Kitai ke lebih agi nyau maya ke diatu, lebuh kitai nyau nyamai nyau bisi wang ringgit, kitai datai mega mantu rumah ke tusah, ke tasah ngena duit ringgit.

Seruran betulung

Tulung enggau bantu ngagai rumah panjai sebuah enggau rumah panjai sebuah patut diteruska, ditampung orang ke dudi ke mangkang rumah panjai.

Lebuh maya gawai tauka pengerami ke besai-besai kitai agi semakai gawai, kitai mengkang megai adat ngambi ngabang.

Rumah-rumah ke endang semakai gawai nya endang dipadah, dikangau asuh datai magang. Enti agi kelia bepadah kitai, nimpuh hari ngasuh pengabang datai.

Tambah mega diatu nyau muntang amat jalai kitai tau bepadah. Telefon binching nyau sepeneka nyulik laban arus telefon ke nyau majak menyana nyadi sepeneka ati kena ngangau madahka pengabang datai.

Ukai semina naka nya aja, pengabang ke datai nya agi disambut enggau adat, agi dikelalu enggau basa ke pemadu tinggi sereta manah ke ditemu kitai, enggau arak enggau tuak, enggau jaku bebuah enggau tabuh enggau gendang.

Bisi nya dibela semalam-malam kelimpah bejalaika pengawa ti enda tau enda diatur, makai ngirup, bebuti-betundi, bungah, andal enggau pangan diri.

Pengawa begulai ke baka tu mih ke ngasuh penyerakup kitai entara sebuah rumah enggau sebuah rumah bukai majak rat, ke lebih agi baka ti endang ditemu kitai, ba rumah panjai bukai ke besemak enggau kitai nya ukai tentu orang bukai, agi kaban belayan, agi kunsi buah tanah, agi bekunsi memudai tempalai.

Kelimpah ari nya kitai nadai nangi ngabang ngagai rumah sebuah-sebuah taja pan siku dua aja orang dikelala kitai dia.

Kitai nemu orang endang manah enggau kitai, kitai mega nemu sapa-sapa temuai ke datai taja pan enda dikelala endang deka diterima magang ke lebih agi lebuh maya bisi pengerami.

Rambau Gawai Dayak ambika banding, pemanah kitai bansa nyata bendar dipeda. Temuai ke datai endang disambut enggau manah, ukai semina bansa kitai empu, bansa bukai mega disambut, dirandau sereta diberi makai.

Penyerakup kitai dalam sesebuah rumah, entara rumah sebuah enggau sebuah rumah bukai sigi rat bendar.
Nya alai kemaya hari tu dunya udah mansang.

Kitai mega diatu nyau mayuh gaya jalai pendiau, kelimpah ari ke di rumah panjai kitai mega diau begenturung, diau ba rumah nyembuah-nyembuah lalu diatu mayuh mega kitai ke diau mangkang pasar, diau sereta meli rumah di nengeri.

Tu mega manah, reti iya kitai bisi pemansang, enggau orang bekereja ba kompeni, enggau orang kereja ba perintah, enggau orang muka dagang, bejalaika bisnes enda ngira pengemit enggau pemesai. Semua tu tadi endang asil ari buah penyerakup.

Penyerakup kitai endang meruan enti kitai beratika iya enggau silik. Kitai Dayak bisi gerempung ke ngemataka kitai baka, Sarawak Dayak Nasional Union, Serakup Indu Dayak Sarawak, Sarawak Dayak Iban Association, enggau ti bansa nya ti sama bisi juluk ati deka nyerakupka semua kitai.

Pengawa manah

Kitai meda mayuh pengawa ke manah-manah digaga serakup, ke bansa kitai dikena nulung tauka mantu bansa kitai ba mayuh bidang, baka ba pelajar, main asal, enggau ba pemansang bukai.

Kati bisi penyerakup tauka beduruk kitai ba pengawa dagang, bisi penyerakup kini kitai dalam ngemansangka pelajar anak uchu kitai, kati bisi penyerakup kini kitai ba ngemansangka jaku kitai?

Saut iya bisi! Kitai bisi gerempung dagang, kitai sama begerah kin-kitu meransang bala kitai nganjung anak uchu besekula ngagai tikas ke tinggi, kitai sama temegah ati ke bansa kitai, daya idup kitai, jaku kitai sama dikelala orang.

Penyerakup ba tikas ti tinggi tu patut terus diperansang, ditanggam, ditegap, sereta dikemansangka agi.
Buah penyerakup ti tegap, penyerakup ti ditanggam manah deka mai mayuh penguntung enggau pemansang ngaga bansa kitai ke lebih agi ba dunya moden, dunya digital, dunya ke nadai berupai entara baka ke diatu. Kenu ku orang penyerakup nya mih pugu pengering.

Nya alai enti kitai beserakup tentu kitai ulih maju sereta ulih mansang jampat agi.

Suara Sarawak