ARTIKEL

Begawai dalam PKP

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Gawai Dayak 2021 sekali agi kitai semina ulih ngintu adat Gawai begulai enggau diri sebilik aja ketegal penyakit Covid-19 ke benung balat ngerekai di menua tu.

Nyadi Atur Pengawa Standard (SOP) ke udah ditetapka perintah dikena nagang pengerekai penyakit tu enda ulih enda dititih laban nya sebagi ari chara dikena kitai nyaga diri empu enggau mega orang ke berimbai pendiau enggau kitai.

Seninjik mega, taun tu udah digerah raban bekuasa dia Gawai taun tu deka pan enda diintu nyerumba Atur Mindah Betagang (PKP) ke benung dipejalai di Sarawak kenyau ari 29 Mei nyentuk 11 June 2021.

Nya alai, chukup sinu laban dua taun bejurut pengerami Gawai diintu kitai berasai nyelai ari taun ke udah-udah. Ambika banding rayat ke gawa di mengeri nadai disagi pulai ke menua diri, nadai ulih bejalai sengapa mindah ngagai pelilih menua bukai lalu maya hari Gawai mega nadai tau ngabang ngagai rumah kaban belayan.

Di rumah panjai mega, bala JKKK endang udah ngaga SOP ungkup rumah panjai diri. Sida enda ngemendarka orang luar niki sebarang enti nadai tuju ke berat. Ba media rama bisi diayan mayuh rumah panjai udah ngaga notis ngeletak ukum mata duit ngagai orang luar ti ditemu niki rumah panjai enggau nadai pemendar.

Kedua ruai rumah panjai dipelepa enggau tali bemacham chura dikena nagang diri serumah ngusung pangan diri. Semua atur tu diterit betuju nentuka pengelikun semua peranak rumah panjai.

Taja pia, adat Miring tetap dikemendar dipejalai tang ditatak ngagai 10 iku aja sereta raban ti ngemujurka adat tu mesti nguna sengkabung mua enggau nyaga takah ari pangan diri. Nya alai, titih mih semua SOP ke udah digerah raban bekuasa ngambika udah abis begawai tu ila kitai diseliah ari pandemik ti kelalu kepapas. Kitai deka meda penyakit tu jampat pukas awakka semua kitai ulih idup lantang baka selama.

Ngelansa semangat ngintu Gawai, di media rama diatu udah mupuk richah enggau gambar-gambar bala bakih kitai ti bekenaka ngepan Iban tauka pekayan asal bansa diri. Nyadi tu siti chara baru ke chukup manah dikena ngelai kitai bansa Dayak seruran ingatka adat asal diri enggau temegah nyadi anak Dayak.

Sapa agi dikeandalka ngetanka adat bansa kitai Dayak, enti ukai nuan enggau aku. Nya alai, arapka isu sensitif ke udah negu enggau balat nelihka ati kitai sebedau tu bekaul enggau ngepan Iban dikearapka enda matahka semangat kitai gagit ngintu Gawai. Tejuka raban penerit adat bejalaika atur ti patut ungkup penyalah ti udah disanda.

Sambut mih Gawai Dayak 2021 enggau ati gaga, irup ai pengayu lalu besampi ngarapka bansa kitai enda agi lemi baka asi digulai ai, minta gayu guru gerai nyamai enda mudah alah ayu diregau semengat mimpi rawan, chelap embap nguan menua diseliah ari penyakit Covid-19 ke benung berampit, anak ke besekula bulih pemandai, bulih pemintar, bidik lansik, betuah belimpah, raban ti bekereja gerah mudah bulih duit, bulih ringgit, jampat niki pangka, tau kaya raja, raban ti deka nyereta sebarang pekit sekalika dalam menua enggau tikas entarabansa tau teulihka pemujur, terus pegari tampak rita di maya dunya, minta semua anak Dayak tau bisi pengering enggau pemerani murih aki kitai Keling Gerasi Nading Bujang Berani Kempang.

BERITA LAIN

Pengelanchar kuasa karan sepanjai Sukma dijaga

KUCHING: Opis Menteri Utiliti enggau Telekomunikasyen deka nentu bekal kuasa karan sepanjai Lumba Malaysia (Sukma) XXI 2024 ti deka diatur ba Sarawak lanchar. Sapit Menteri

BERITA TERBARU