PENANYI tebilang enggau lagu Pegai Teguh Danji Tua, Stephy Puyang ti bepadu nyawa enggau penanyi Richard Lee diatu mujur ngeluarka lagu pemadu baru diri ti pejuluk Nguntik Nuan.

Lagu nya mujur dikeluarka ba pelasar YouTube Kaban Music Production (KMP) Sdn Bhd kena 26 Mei tu tadi.

Ba timpuh dua bulan aja, lagu nya mujur dipeda lebih 40,000 orang enggau nerima kelai like lebih 700 ari mensia mayuh.

Ungkup penerang, nama amat penanyi tu iya nya Stephanie Puyang Stephen tang ba dunya pemerindang, iya ngena nama Stephy Puyang.

ANANG MALU NGUJI NASIP
Penanyi bajik bebansa Kenyah nya madah, lagu Nguntik Nuan nya bekenang ke siku dara ti bisi ati tauka nyimpan pengerindu ngagai siku bujang.

Nya alai, ku iya, dara nya naka ulih nguji nguntik bujang betuah nya lalu besemaya deka ngambi iya nya ke sulu ati.

“Dara tu ngembuan pengandal ati ti besai ulih ngempu sereta nanggam pengerindu enggau bujang betuah tu.

“Seagi-agi seput mengkang ba dada, dara tu enda mudah nyerah alah laban iya endang keran ke bujang betuah tu,” terang Stephy.

Nya alai, penanyi bajik nya ngelalau mensia mayuh ti bisi nyimpan pengerindu ngagai siku bujang tauka dara ngambi enda sesekali malu ngujika nasip diri.

Iya madah, nadai salah kitai nguji nasip nguntik bujang tauka dara nya nyangka iya pen bela ngembuan pengerindu sebaka ngagai kitai.

“Enti udah selatan diatur Petara, bujang tauka dara nya tetap diempu kitai lalu begulai lantang nyentuk ke tuai,” ku iya seraya tuchum lelegup.

SELATAN MERINDANG
Lebuh dirandau senentang pejalai diri ba dunya pemerindang, Stephy nya madahka diri berengkah tepejuh ba dunya pemerindang ba taun 2020.

Tusui Stephy, semua nya bepun lebuh iya ngujika nasip diri enggau orang ngeruh ai masuk Audisyen BKMP6 ba taun 2020.

“Ba audisyen renggat kedua ti diatur KMP Sdn Bhd tu, aku mujur ditanya sida nyadi siku artis mendam ba baruh perabung sida.

“Maya tu suba, aku chukup tekenyit bechampur gaga laban enda ngadang diri mujur diterima enggau diberi pengandal ati nyadi siku artis ba baruh perabung KMP Sdn Bhd.

“Tu siti peluang berega ba aku, nya alai, aku enda muai peluang tu pia aja lalu berengkah ngerikod enggau ngeluar lagu diri.

“Lagu keterubah aku iya nya lagu Pegai Teguh Danji Tua ti bepadu nyawa enggau penanyi tebilang Richard Lee.

“Udah nya, aku lalu ngeluarka lagu Jalai Beserara, Pulai Begawai enggau pemadu baru iya nya lagu Nguntik Nuan,” terang Stephy.

Iya madah, pengerindu iya ba pengawa belagu nya endang dikembuan iya ari mit.

Nya kebuah iya suah betelefon ngagai Wai FM Iban lalu suah belagu ba program ungkup anak mit maya nya suba.

Taja pia, ku Stephy, sebedau tepejuh ba dunya pemerindang industri muzik Dayak, iya nadai kala enggau orang masuk bemacham pekit belagu.

SUKUNG PENUH
Dara bajik datai ari Bagi Menua Benak Pangka Pasang tauka Simanggang nya madah, nadai siku sida sebilik ngaul pengawa belagu tauka dunya pemerindang.

Iya betuah laban minat iya ba pengawa belagu nya nerima sukung penuh ari sida sebilik kelebih agi apai enggau indai iya.

“Seduai meh orang ti balat nyukung enggau meransang aku ngaul pengawa belagu tu laban seduai nemu pemesai minat aku ba pengawa tu.

“Aku chukup betuah sereta beterima kasih laban ngembuan apai indai ti chukup mereti minat enggau juluk aku,” ku Stephy.

Nangkan nya, iya madah, sekumbang tepejuh ba dunya pemerindang tu, iya semampai nerima timbal manah ari mensia mayuh kelebih agi bala peminat diri.

Stephy madah, bala peminat enggau raban KMP Sdn Bhd seruran meri jaku peransang, ajar enggau pesan ti beguna dikena iya nyingkang jauh agi ba pengawa merindang.

RANSING BEDAGANG
Kelimpah bejalaika pengawa merindang, Stephy mega siku pedagang ti bejualka bemacham produk minyak angi tubuh.

Produk nya endang minyak angi tulin ti tebilang baka minyak angi tubuh Gucci, Versace, Louis Vuitton enggau mayuh agi ti bukai.

“Enti ba palan bebelika barang, rega produk minyak angi tubuh tu endang mar tang aku nyual ngena rega ti murah agi ari nya.

“Ambi ke chunto, enti rega minyak angi tubuh dijual tu dijual ngena rega RM500 ba palan bebelika barang, aku deka nyual ngena rega ti murah agi ari nya,” ku iya.

Ukai naka nya aja, iya mega bisi nyual enggau nyendia servis bouquet ti ulih nyadi ke tepa ungkup orang dikesayau baka apai, indai, laki, bini, sulu ati, bala bakih tauka kaban belayan.

Stephy madah, iya endang ngena bungai idup baka bungai Rose enggau Baby’s-breathe ti bemacham chura.

“Lebih manis, lebuh bouquet tu dipadu ngena produk minyak angi tubuh. Tu ulih ngedut pemanah kaul enggau mandangka nambah penyayau ngagai orang dikesayau kitai.

“Nya alai, mensia mayuh ti deka meli produk minyak angi ti tulin ba rega ti baruh agi tauka begunaka servis bouquet, kita patut ngiga aku.

“Enti deka nemu silik senentang produk minyak angi tubuh enggau servis bouquet tu, kita diperansang ngelawa Facebook Stephanie Stephen tauka Instagram @luxuryscent.perfume,” terang Stephy.

NYAGU INDUSTRI MUZIK DAYAK
Nya alai, anak tunggal nya madahka diri beterima kasih ngagai semua orang kelebih agi bala peminat, raban KMP, sida sebilik, kaban belayan enggau bala bakih ti seruran nyukung iya ngelama tu.

“Aku chukup betuah laban kita semua enda leju meri sukung penuh ngagai aku kelebih agi ba pengawa merindang.

“Enti nadai sukung ari semua kita, sapa meh aku? Nadai meh nama Stephy Puyang ba dunya pemerindang Dayak tu.

“Nya akai, aku ngarap semua kita terus meri sukung penuh ngagai aku ngambi aku ulih nyingkang jauh ba pengawa tu sereta ngeluar mayuh lagu diri dudi hari dikena merindang semua orang.

“Sukung mega bala penanyi Dayak ti bukai ngambi kitai ulih nyagu industri muzik Dayak tu ngagai tikas ti tinggi agi baka industri muzik menua luar.

“Pekara tu beguna amat ngambi industri muzik kitai majak dikelala semua orang ukai semina ba Borneo ditu aja tang menua bukai,” terang iya.

Stephy ti beumur 23 taun nya madahka diri deka ngeluarka mayuh lagu bekualiti dudi hari dikena merindang bala peminat sereta setipak enggau pemansang idustri muzik kemaya hari.

Iya madah, diatu industri muzik Dayak majak maju enggau nyingkang deras agi nunda singkang industri muzik menua luar.

Pia mega, ku iya, mayuh bala artis Dayak bepenau dikangau merindang ba luar Sarawak lalu nya siti basa ngagai industri muzik Dayak.

“Tu ngelai artis enggau industri muzik Dayak majak diaku enggau diterima semua orang kelimpah nyadi peransang ngagai bala penanyi baru nyengkaum aku empu,” ku iya.