SERIAN: Genap orang kelebih agi tuai komuniti enggau orang gawa perintah patut chakah bejalaika tanggungpengawa mutar isu makai suap enggau ngasi.
Menteri Pelajar, Inovasyen enggau Pemansang Bakat, Datuk Roland Sagah Wee Inn madah, isu nya ngujung ke kos puku enggau pemansang ungkup semua program dipejalai majak nambah.
Iya nyemetak madah, enti isu nya enda ditagang enggau ngasi, nya deka mai pengerugi besai.
“Orang gawa perintah nyadi raban ti mudah ngereja pengawa tu kelebih agi sida ti mangku pengawa ngaga pemutus enggau pekara pemansut perintah.
“Nya alai, aku ngarap Unit Integriti ba ejensi perintah enggau Pegawai Integriti Bepenau (CeIO) patut bejalaika pangku pengawa besai nempa ulah integriti ba ejensi perintah tauka dalam komuniti.
Sagah mansutka jaku nya rambau bejaku ba Program Bejadi Roadshow Integriti Edisyen Ketujuh 2023 ba Pelilih Serian, ditu kemari.
Iya madah nyemetak, pengawa milih tuai ti engkeman ba sebengkah organisasyen beguna ngambi organisasyen nya ngembuan rikod beresi sereta nulak makai suap.
“Lebuh dipadu nyadi tuai komuniti, pekara ti patut dikemerat nya pekara bekaul enggau komuniti.
“Kitai naka ulih nyeliahka orang bejaku senentang integriti kitai.
Kitai mega ngenggai ke hak komuniti dikeduan sida ti enda lurus ati enggau ngemeratka diri empu,” ku iya.
Nya alai, iya ngelalau semua renggat komuniti bejalaika pangku pengawa sida nagang isu makai suah ari majak nyadi.
“Integriti ukai semina prinsip enggau pekara manah tang patut dipejalai ba genap pengawa dikereja kitai.
“Komuniti patut pintar milih tuai ba sebengkah organisasyen ti bisi ngembuan integriti megai rikod enggau penerang belanja sereta nyeliah penyalah makai suap,” ku iya.
Sagah madah, integriti endang udah dikembuan ulih meri pemaik ngagai kitai bejalaika pengawa dagang sereta meri pengandal ngagai bala pemeranak puku milih Sarawak nyadi palan beranak puku.
Pekara nya seraris enggau juluk Premier Sarawak, Datuk Patinggi Tan Sri Abang Johari Tun Openg ti deka nempa Sarawak nyadi menua lantang enggau beintegriti ba pengawa ngatur pemansut enggau pengaya Tanah Kenyalang.
Sama datai Sapit Menteri Integriti enggau Ombudsman Sarawak, Datuk Murshid Diraja Dr Juanda Jaya sereta Sapit Menteri Komoditi enggau Pemansang Wilayah Sarawak, Martin Ben.
Adun Bukit Semuja, John Ilus, pengari Direktor Unit Integriti enggau Ombudsman Sarawak, Wan Mohamad Wan Drahman sereta temuai dipebasa ti bukai mega bisi datai.
