Begulai manah, anang pambar

ENGKILILI: Rayat di Kunsil Nengeri (DUN) Engkilili dipinta ngetanka penyerakup enggau pangan diri enda ngira bansa enggau jalai pengarap.

Kaban Kunsil Nengeri (Adun) Engkilili Dr Johnical Rayong madah, jaku ‘Satu Engkilili’ patut dikembuan tiap iku rayat nyengkaum maya ngaduka pengawa.

“Anang pambar ari pangan diri sereta begulai manah dalam semua pengawa enda ngira kitai nya Iban, China tauka Melayu. Satu Engkilili,” pia ku iya madah.

Jaku iya nya dikenatai Devester Renang ti ngarika iya maya ngulu Pengerami Merarau Beserimbai enggau Pengawa Betetap ke diatur Gerija St Michael, kilah ensana.

Nambahka jaku iya, rayong mega madah, rayat dia patut bendar pengelebih ke dikembuan sida ba penyerakup enggau pangan diri.

“Kitai ulih begulai, idup enggau lantang baik nya begempung ba politik tauka dalam ngereja pengawa ti nempa pengidup sejalai segulai,” ku iya madah baru.

Berebak enggau nya, Devester madahka diri berasai temegah ati laban Rayong endang chakah bendar meri macham bansa bantu ngagai sida.

Kelimpah ari nya, ku iya, Dr Rayong mega semampai nulung gerija nyengkaum gerija st Michael.

Ba pengerami nya, Dr Rayong bisi ninggalka pemeri RM7,000 ungkup Gerija St Michael enggau RM3,000 ungkup SK Nanga Tebat.

Sama bela datai maya pengerami tu iya nya Bisop Aries Sumping Jingan enggau Chairman Pengatur Pengerami Revd Moses Jakir sereta bala bukai.