SARATOK: Projek Ngaga Begunan Baru Sekula Primari (SK) Abang Leman, Kabong disadang tembu penuh November 2023.
Kaban Parlimen Saratok. Datuk Ali Biju madahka projek beungkus RM42 juta nya mungkur pengawa ngaga baru 30 bilik kelas, buding ungkup 600 iku nembiak enggau 12 unit kuarters pengajar.
Ku iya, projek nya dipejalai ngena Sistem Berumah Industri (IBS) ke alai kualiti kereban enggau ramu dikena sereta kereja ba taba projek ulih dipatau sereta enda begunaka mayuh pengereja.
“Nitihka penerang ari perunding projek tadi (ensanus), pengawa disadang tembu penuh manggai November 2023, laun ari timpuh asal projek.
“Pejalai terit Atur Mindah Betagang (PKP) dua taun ke udah nyadika pun penanggul projek tu laun tembu kelimpah ari sekeda penekul ke bukai.
“Taja pia, kitai arapka projek tu ulih dirumban lalu tembuh nitihka timpuh ti baru dipadah tadi laban aku nemu, projek tu lama udah dianti peranak Kabong ditu,” ku iya mantaika pengandal diri.
Ali mansutka jaku nya pengudah ngulu Penerang Khas Status Pemadu Baru Projek Ngaga Baru SK Abang Leman, Kabong ba Opis Pelilih Kabong sebedau dibai ngabas taba projek.
Iya ke mega Sapit Menteri Pengeluar Kuasa enggau Pengeraja Asal madahka SK Abang Leman nyadi siti ari beberapa sekula repuk ba sitak Parlimen Saratok ti dikemanah Opis Menteri Pelajar (KPM).
“Pengawa ngemanah tauka ngaga baru sekula repuk dipejalai berenggat ke alai KPM mega udah setuju nampung pengawa ngena IBS ba projek bekaul.
“Reti iya, ungkus dikena deka murah agi lalu pengawa ulih dirumban enti dibanding ngena chara selama.
“Nya alai,besai amat pengandal aku projek tu enggau projek ke bukai ulih tembu meruan lalu meri pengelantang ngagai komuniti sereta nyamin pemujur ba sekula,” terang iya.
Ali madah baru, iya deka seruran matau rat pejalai projek ba SK Abang Leman lalu minta raban kunteriktor bebendar agi gawa nentuka projek ulih tembu nitihka timpuh baru, November 2023.
Kelimpah ari nya, iya mega ngingatka Pegawai Opis Pelajar Pelilih enggau raban SK Abang Leman emp uterus madah ngagai iya tauka staf ba Palan Servis P.205 Saratok enti sema bisi isu bekaul pejalai projek nya.
“Aku dekaka pejalai projek tu lanchar lalu ulih tembu ukai semina nitihka timpuh tang mega kualiti kereja mega dikira,” tandu iya nyemetak.
Sama datai mendingka penerang khas nya Pegawai Opis Pelajar Pelilih Saratok, Anis Madeli, Pegawai Opis Pelilih Kabong, Mohd Rashdan, Pegawai Ngatur Pengawa PPD Saratok, Ron Hazli, Perunding Projek, Hanif enggau Zul, pengari raban kunteriktor, Melvin sereta pengajar Yusuf ti ngarika Kepala Pengajar SK Abang Leman.
