SIBU: Perengkaguna ba Sekula Primari (SK) Sungai Pinang, ditu majak repuk lalu nadai sapa nemu pemar diasaika sekula penyauh urung 60 Kilometer ari pasar Sibu nya.
Sekula ti nadai buding nya ba menua ulu Bawang Assan enggau semina ulih dilawa ngerenchah jalai sawit iya nya ari Ladang Retus nyentuk sekula enggau jalai bebatu sereta belubang.
Sekula tu semina bisi sebuah begunan kayu enggau sebuah balai mayuh guna aja.
Enti deka ngelawa sekula tu, kitai deka ngerenchah jalai ladang penyauh urung 55 km.
Pia mega, sekula tu nadai disedia bekal kuasa karan enggau ai beresi.
Peranak sekula nya agi ngena injin api enggau nimbun ai ujan dikena bebasu enggau ke bukai.
Siku apai indai ke enggai ditemu nama madah, sekula nya udah lama repuk taja piak sekula suah mantaika penanggul tu ngagai piak bekaul.
Taja pia, nyentuk diatu penanggul SK Pinang ti repuk tu apin diseleti manah.
“Kelimpah nadai disikap perengkaguna pemun, anak kami ditu mega belajar ba luar kelas lalu sama mega enggau bilik pengajar didiri ba luar kelas.
“Kami berasai sinu meda bala anak belajar ba endur ke enda likun enggau lantang.
“Sida mega belajar beperabungka zink tang nadai dik enggau manah.
Bala anak kami enda lantang belajar ba bilik nya kelebih agi maya hari angat laban bisi disediaka siti kipas aja,” ku iya madah ngagai pemberita Suara Sarawak, ditu kemari.
Ku iya, sekula nya bisi 69 iku nembiak ti belajar enggau mayuh penimpang ari sukut perengkaguna.
Terang iya, bisi 17 iku nembiak belajar ba prasekula ditangkan Primari Satu (3), Primari Dua (11), Primari Tiga (11), Primari Empat (6), Primari Lima (14) enggau Primari Enam (7).
“Bilik pengajar nya diengkah ba luar taun nyin kemari ketegal enda umbas endur enggau begunan,” terang iya silik agi.
Iya mega madahka nembiak Primari Tiga udah dua taun belajar ba luar tang nadai bilik kelas ketegal sekula nadai bilik kelas tauka begunan enda chukup.
Nambahka nya ku iya, endur ti sekut nya ngujungka nembiak Primari Tiga diasuh pindah ba luar.
“Nembiak prasekula nyentuk Primari Enam kelimpah ari Primari Tiga agi belajar ba bilik kelas baka selama tang sekut,” ku iya nerang silik.
“Ketegal bilik kelas enda umbas, nembiak Primari Tiga diasuh belajar ba luar kelas entara ba dewan enggau begunan kelas.
“Nya kebuah, siti begunan ba SK Sungai Pinang nya semina bisi enam bilik kelas tang enda umbas ngujungka nembiak Primari Tiga dipindah ke luar seraya bala pengajar mega diasuh ba luar laban nadai bilik puang.
“Naka tu, bisi 13 iku staf sekula nyengkaum pengajar ba sekula nya,” ku iya nerang.
Iya mega madahka diri berasai sinu meda bala nembiak ba endur ti enda lantang lebuh hari angat.
Berebak enggau nya, bala pengajar ti nadai bilik mega diau ba endur ti beperabungka zink enggau semina disediaka siti kipas aja.
“Pekara tu ngujungka bala pengajar enda ulih fokus maya ngajar tang nya endang pengawa lalu sida naka ulih berundingka chara mantu nembiak ditu,” ku iya nusui pasal jasa bala pengajar ditu.
Nya alai, iya minta piak bekaul patut berundingka pemansang ke patut ngagai SK Sungai Pinang laban sekula nya patut dikemanah beduduk ari pemayuh nembiak majak nambah ninting taun.
“Gerempung Apai Indai enggau Pengajar (PIBG) enda ulih ngereja sebarang pengawa pasal penanggul tu.
“Sida suah nganjung peminta pasal penusah sekula ti repuk tu tang nyentuk diatu peminta nya enda dikeamat.
“Aku ngarika apai indai enggau peranak asal ba Sungai Pinang ditu, kami berasai sinu meda penusah diasaika anak kami lebuh belajar ba sekula ke mayuh penimpang tu.
“Nya kebuah, kami minta piak bekaul ulih nyaup mutarka penanggul sekula ti repuk tu,” tandu iya.
