KUCHING: Panglima Soldadu Darat, Jeneral Tan Sri Datuk Zamrose Mohd Zain udah bejadika Begunan Kort Soldadu Baru ba Kem Penrissen enggau Rumah Ruang Bilik Raban Soldadu (RKAT) baru di Kem Semenggo, ditu kemari.
Begunan Kort Soldadu ti udah tembu penuh kena 17 Januari tu tadi nya suba sebuah dewan skuasy tang diubah nyadi Kort Soldadu.
Pengawa nirika begunan nya inisiatif Zamrose ke alai lebuh nya iya nyadi Panglima Medam Timur Soldadu Darat.
Seriris enggau pengawa nirika Sel Kort Soldadu Darat (SMT TD), Kort Soldadu tu mega ulih dikena ungkup servis Soldadu Tasik DiRaja Malaysia (TLDM) enggau Soldadu Langit DiRaja Malaysia (TUDM).
Kebuah pia laban nadai begunan baka nya di Wilayah Timur ungkup tuju bechara ari dua servis nya.
Zamrose ti keterubah iya ngabas Markas Pemerintahan Medan Timur Soldadu Darat udah nya berangkat ngagai Kem Semenggo ngambi bejadika RKAT baru.
Pengawa nirika RKAT Kem Semenggo udah diperambu Opis Menteri Penyaga Malaysia dalam Langgur Pemansang Malaysia Lumpar Ke-10 ke udah.
Nambahka nya, pengawa ngaga enggau nyeleti 223 unit rumah udah berengkah dipejalai kena 9 March 2017 enggau udah tembu penuh kena 22 Julai 2020.
Ba aum pemberita, Zamrose madahka pengawa nirika RKAT Kem Semenggo tu udah mutarka penanggul bekaul palan pengentap enggau rumah kaban soldadu, ukai semina ungkup Raban Batalion ke-11 Rejimen Soldadu Melayu DiRaja, tang mega perengkaguna raban Soldadu Darat Malaysia ti gawa ba unit semak nya.
Sama datai Panglima Medan Timur Soldadu Darat, Leftenan JeneralDato’ Mardzuki Muhammad enggau Panglima Logistik Soldadu Darat, Mejar Jeneral Muhammad Ariff Soo Abdullah.
