BINTULU: Mensia mayuh dipinta bejimat lebuh meli dagin jani ba pasar beduduk ari mayuh jani tupi ke mayuh parai nyenyit di Durin enggau Bintangor, apin lama ke udah.
Adun Dudong Datuk Sri Tiong King Sing minta sida ke bisi nupi jani nentuka nadai jani ke kena rampit tauka produk dagin jani tama ngagai makit menua tu.
Ku iya, Opis Servis Veterinar (DVS) Sibu diatu benung mansik kes nya enggau ngumpul sampel ngambi diperesa ba makmal sereta minta mensia mayuh sabar.
“Nitihka penerang mayuh jani kena rampit ba tiga buah rumah panjai di Durin lalu semua jani ti ditupi ba kebun sawit besemak mega parai.
“Aku irauka jani ke dirampit nya ngerampit ngagai ladang jani bukai.
“Nya kebuah, aku ngansak semua orang bejejaga seraya nganti raban bekuasa mansik enggau madahka pemutus sida,” terang iya, ditu kemari.
Tiong ke mega Kaban Parlimen Bintulu minta sida ke nupi jelu bejejaga dikena nyeliahka penyakit berampit enggau jelu sida parai.
Iya pechayaka DVS deka mantaika gerah ngagai sida ke nupi jelu sentang chara pemadu manah mutarka pekara tu dikena nyeliahka dagin jani ke kena rampit nya dibeli penguna.
“Aku minta pedagang ti nyual jani enggau produk jani tu anang meli jani ari orang ke enda dikelala.
“Enti sema jani ke kena rampit nya dikemendar tama ngagai makit sekalika chara sengaja tauka enda tu tau nabanka nyawa.
“Nya alai, kitai mesti bejejaga dikena nyeliahka jani ke kena rampit nya dibeli penguna ke tau ngasuh kitai sakit,” ku tangkan Tiong.
