Bejimat, seliah Covid-19

KUCHING: Rayat Sarawak dilalau ngambika terus bejimat nyeliah diri ari pengerekai penyakit Covid-19 di nengeri tu.

Menteri Kaunsil Kandang Menua enggau Pengawa Berumah Datuk Seri Dr Sim Kui Hian madah, penyampau ke dirikod ungkup kes nya diperati bisi berubah nambah ninting hari.

“Nya alai, kitai patut meda penerang berita ari Komiti Penyanga Penusah Ngenyit Nengeri (JPBN) ti betuaika Datuk Amar Douglas Uggah Embas awakka ulih meda penyampau ke nyadi.

“Kemari (13 Febuari) penyampau orang ke diramput Covid-19 nambah manggai 10,000 tang penyampai sida ke bebadi nyawa ba dunya manggai 25,000,” ku iya rambau Pengerami Ngelalu Pengabang Taun Baru China 2020 MPP ba Laman Opis MPP ditu kena 14 Febuari tu tadi.

Tandu iya, Sarawak benasip laban enda ngerikod kes nya naka tu.

“Nya alai, tu tanggungpengawa aku enggau pengawa semua orang nentuka nengeri tu beresi ari kes Covid-19.

“Igi penyakit tu chukup muntang berampit tang pemati ketegal penyakit tu kurang, anang irau,” ku Kui Hian.

Iya madah, dua hari ke udah WHO mega udah meri tangkan ngagai Malaysia dikumbai ba tikas ti ngembuan igi penyakit mai reti ngerampit ari siku orang ngagai siku orang, nasip amat nadai.

“Diatu, taja agi nadai menua ulih mutarka pengerekai igi penyakit tu kelimpah ari China, WHO nangi laban iya ulih ngerekai ngagai menua bukai (luar China) dipelaba 60 ngagai 70 peratus orang ulih kena rampit.

“Dunya bisi 7 bilion mensia, ambika banding 1 peratus mati nyadi nya mai reti enggaui 50 juta mensia. Rayat Sarawak aja bisi 3 juta, nyadi penyampau rayat Malaysia bisi 30 juta reti nya 50 juta rayat di dunya ulih midang ketegal penyakit tu,” ku iya.

Iya madah, tanggungpengawa iya endang meri tangkan ke betul lalu nguji nyelai menua ke bisi kena rampit penyakit Covid-19 baka Singapore enggau China.

“Iya madah sida ke benung ba menua luar anang guai datai kitu (Sarawak) laban nya sempama mai siti penyakit.

Berebak enggau nya iya ngelalau orang dagang ari Sarawak anang guai bejalai ke Singapore enti ukai pekara berat ba pengidup.

Suara Sarawak