MIRI: Komuniti Miri diperansang enda irau ati enggau gaya chura ai paip ti datai ari tangki ai laban nya likun diirup.
Chairman Kaunsil Ai Sitak Utara (LAKU) Sdn Bhd, Datuk Nelson Balang madah, bepelasar Patau Kualiti Ai Irup Nasional (NDWQS), ai paip ba Miri kemaya hari tu agi likun diirup.
“Pesan ari LAKU tu endang bepelasar ke NDWQS lalu ubah ba chura ai paip tu agi likun diirup lalu anang irau sekali ke ai tu likun tauka enda,” ku iya.
Nelson mansutka jaku nya ba aum pemberita pengudah ngetuai Aum Bekaul Isu Ai ba Miri ba Opis LAKU Miri ditu, kemari.
Ku iya, sebengkah pengawa mansik sampel ai kuning ari tangki ai nya udah dianjung ngagai Opis Kimia Bintulu ninting minggu lalu pemutus nya mandangka ai nya agi likun diirup.
“Sampel ai tu mega udah dianjung ngagai raban ketiga ngambi dipansik dikena ngenukuka bekal ai tu beresi enggau likun diirup,” terang iya.
Ngelansa silik, Nelson madah, musin kemarau enggau El-Nino udah ngeruga tikas ai ba Sungai Liku ngagai tikas raya.
Dikena mutar pekara nya, LAKU udah muka pemansut ai sekunder ari Sungai Bakong dikena nambah bekal ai ngagai Tangki Ai Lambir.
Taja pia, ku iya, ai ari Sungai Bakong ngundan perengka organik ti tinggi lalu nya ngujung ai paip bechura kuning.
