ARTIKEL

Bekal gula enggau minyak makai pikit agi mayuh

Facebook
Twitter
LinkedIn
WhatsApp
Telegram

BINTULU: Pengirau mensia mayuh bekaul rega gula enggau minyak makai pikit ti dipelaba niki ngujung ke makit napi penanggul suntuk bekal kededua barang pemun nya.

Tuai Pampang Opis Menteri Dagang Dalam Menua enggau Kos Pengidup (KPDN) Bintulu, Ai Redzamani Abdul Razak madah, ketegal berita sebubu ngapa nya, mensia mayuh meli gula enggau minyak makai pikit ba penyampau ti mayuh.

Nangkan nya, ku iya, bisi mega penerang ti madahka pedagang bisi niat meli barang nya ba penyampau ti mayuh berebak ari pengawa ngatur bemacham program.

Iya madah, nya baka Pengerami Orang Kampung ti deka diatur kena 29 November nyentuk 3 Disember tu.

“Kitai mega enda mantah nyangka bisi pengawa ngelalai kededua barang nya tauka bisi pedagang ti puntan meli barang nya ba penyampau ti mayuh ari makit,” ku iya.

Redzamani mansutka jaku nya rambau dipinta ngelansa senentang isu suntuk gula enggau minyak makai pikit ba makit Bintulu.

Taja pia, iya meri jamin bekal gula enggau minyak makai pikit ba sekeda supermakit agi ba tikas ditagang.

Iya nyemetak madah, pengawa meresa enggau matau ti dipejalai pegawai penerit atur ti udah dipejalai ba selampur Bintulu tetemu ke stok barang tagang nya chukup dikena nangkup peminta penguna.

Ensanus (Hari Tiga), KPDN Bintulu mujur ngerampas 400 kilogram (kg) gula burak alus enggau 272 kg pikit minyak makai beungkus RM1,820 dipelaba dilalai sebuah supermakit ba Bintulu ditu.

Pengawa datai ngenyit nya dipejalai pengudah nerima ripot ari mensia mayuh ba sebelah media sosial bekaul penanggul suntuk bekal minyak makai pikit satu kg ba makit.

Seraban pegawai penerit atur KPDN lengkas digerah mansik sekeda supermakit ba baruh Ops Sorok dikena matau sebarang pengawa ngelalai barang tagang nya.

LAIN-LAIN BERITA

BERITA TERBARU