Bekal minyak makai subsidi chukup

KUCHING: Opis Menteri Dagang Dalam Menua enggau Pekara Penguna (KPDNHEP) ningkah penemu madahka kitai suntuk bekal minyak makai subsidi.

Menteri iya, Datuk Seri Alexander Nanta Linggi madahka perintah agi netapka kuota minyak makai subsidi penyampau 60,000 tan metrik ninting taun.

“Tu sama enggau 60 juta piket polibeg 1 kilogram (kg) ke alai 1.5 kg ungkup semua rayat Malaysia nyengkaum Wilayah Sarawak enggau Sabah.

“Perintah mega nambahka agih belanja nyendiaka bekal 60,000 tan metrik ninting taun taja rega RBD Palm Olien udah niki,” terang iya nyemetak.

Pia mega ku Nanta, perintah ngadang ungkus nya deka nambah ari RM400 juta ngagai RM1.8 bilion enti sema rega RBD Palm Olien majak niki.

“Nya alai, pemutus perintah mengkang ngena kuota dalam Skim Netapka Rega Minyak Makai (COSS) nya mandangka penyiru perintah nyamin pengelantang rayat enggau tikas idup sida,” ku Nanta.

Suara Sarawak