Bekal pemakai di Lawas dijamin chukup

LAWAS: Bekal pemakai ba kandang menua Lawas dijamin chukup nyerumba Hari Raya enggau Gawai Dayak.

Sapit Kepala Menteri Datuk Amar Awang Tengah Ali Hasan madah, bekal pemakai nya chukup ungkup timpuh sebulan nyentuk tiga bulan ke deka datai.

“Asil ari pengawa matau ba sekeda endur ngaul sekeda tauke ba Pelilih Lawas, bekal pemakai chukup ungkup Hari Raya enggau Gawai Dayak dalam kandang sebulan nyentuk tiga bulan.

“Enti bekal pemakai ti kurang, tauke deka ngudar baka stok gula ti udah datai kemari (ensana),” ku Awang tengah.

Awang Tengah mansutka jaku nya ngagai pemberita lebuh ngabas tauke bekal pemakai ba Lawas, ditu ensana.

Terang iya, ba Pelilih Lawas, pupu rata stok telu manuk bisi 242,400 iti, 10,350 kilogram manuk, 95.7 metrik tan metrik minyak makai, 21.4 metrik tan tepung gandum, 31.4 metrik tan gula, 18.9 metrik berau enggau 3,191 tong gis LPG.

Pia mega, iya madahka pekara tu nentuka pedagang enda nikika rega sepeneka ati enggau ngelalaika bekal pemakai.

Nya kebuah ku iya, piak Opis Menteri Dagang Dalam Menua enggau Pekara Penguna (KPDNHEP) deka terus bejalaika pengawa meresa kedai.

“Nambahka nya, Sarawak ngembuan urung 800 palan nyual barang enggau kuota ba bulan June deka dikena dulu ngambi nangkup peminta bala penguna bulan tu,” terang iya.

Taja pia ku Awang Tengah, diatu iya irauka bekal dikena ngaga rumah baka simen.

“Kami udah ngemendark sektor kunteriktor dibuka baka selama enggau siti ari utai diguna iya nya simen ke udah kurang ditu.

“Aku udah ngasuh tauke ngudar simen laban pengudah Hari Raya, sektor berumah deka dipejalai jampat,” tandu iya.

Nambahka nya ku iya, enti sema utai diguna baka simen, besi, pasir enggau batu bata enda chukup tau ngasuh projek ti deka dipejalai tejanggal laban utai tu diguna ba sektor kunteriktor.

Ku iya, kuota simen ba Pelilih Lawas ditu bisi urung 500 tan enggau enti sema projek dipejalai sama, stok ke bisi diatu nya enda chukup.

“Tang kitai ba Limbang enggau Lawas tu semak aja enggau Sabah.

“Nya alai, enti sema bisi utai diguna nya kurang, kitai ulih meli ari Sabah nyengkaum semin,” terang iya silik.

Suara Sarawak