Bekelala enggau dua finalis ACSJ Ke-6

Eyqa Saiful enggau Dominic Christy

Berengkah ari minggu tu nyentuk ngagai ujung September, aku semina mansutka berita sebelas iku finalis Anugerah Carta Sapa Juara (ACSJ) ti ke-6.

Tuju iya awakka semua peminat ulih nemu sereta berasai semak agi enggau finalis ti dikerinduka sida.

Berita anugerah minggu tu ungkup finalis Eyqa Saiful (Empeleman) enggau Dominic Christy (Siti Sumpah Siti Danji).

Semilan iku agi finalis bukai nyengkaum Federick Sut (Anyut), Taju Remaong (Jempuk), The Crew (Ayas Nuan), NK Yongai (Indai), Joseph Dressa (Ganti Ti Menyana), Tony Rumpang (Jauh), Alexander Peter (Tanggam Rat Ba Ati), D’ Crystal Band (Kemayang Nuan) enggau Isa Lee (Tubai Pengerindu).

Dominic Christy

Program ACSJ

Program Anugerah Charta Sapa Juara (ACSJ) nya siti program pemerindang dikeluarka radio Waifm Iban ti bepekitka lagu tebilang nengah sistem undi peminat.

Setaun bisi dua belas iti lagu ti dipilih nyadi champion ninting bulan.

Lagu ti udah kala nyadi champion ninting bulan deka dipilih enggau masuk ACSJ ti diatur ninting taun lalu taun tu masuk renggat ti keenam.

ACSJ ukai semina nyadi palan endur bepekitka lagu pia aja tang iya udah meri peluang ngagai bala komposer enggau pemuzik mantaika penau enggau pengelandik diri.

Nambahka nya, ACSJ mega udah ngangkatka nama lagu Iban ngagai tikas ti tinggi agi seriris enggau lagu bansa bukai di menua tu.

Eyqa Saiful

Sejarah penatai lagu Iban nya berarat ari menua barat enggau menua Asia kelebih agi ari Semenanjung Malaysia.

Bepun ari nya urung ba pun taun 1960 suba lagu Iban ngerembai enggau badas datai ke diatu.

Ukai naka nya aja, lagu Iban ukai ungkup Iban aja yang ke mensia di serata dunya.

Kitai udah bisi penemu enggau pengelandik ngaga tiun enggau lirik. Pia mega udah ulih ngati kediri ba semua proses ngerikot di studio enggau chara ngelakuka lagu diri (promo) nengah teknologi baru (media rama).

Enti kitai majak kreatif lalu enda semina ngetanka utai ti udah, enda patut enda ulih lagu Iban ngerembai badas sereta didinga di menua bukai baka lagu Korea ke diatu tau dikumbai udah nguasa dunya pemerindang di dunya tu.

Lagu Empeleman

Eqya Saiful ukai orang baru ba ACSJ laban iya udah kala bulih lumur tiga ba ACSJ ke-4.

Maya nya suba iya mega nyadi Finalist Popular ACSJ 4 Majalah Senawah.

Taja umur agi biak, Eyqa entara artis tebilang lagu Iban lalu semampai bisi merindang enda milih endur di serata Sarawak.

Ba ACSJ ke-6 tu Eyqa mai lagu Empeleman ti digaga dua iku komposer popular Jesley Jabu Bajang enggau Matthius Mambang Bajang.

Empeleman nya siti lagu berentak lundai ti dikeluarka Kaban Music Production (KMP) lalu producer iya Amberlly Vickie.

Muzik Empeleman digaga gitaris Jumphull Morsdoc. Ditanya nama pengarap iya ba ACSJ ke sekali tu, iya arap peminat iya tetap nyukung iya.

“Aku arap peminat aku tetap nyukung aku baka ke suba-suba.

Terima kasih ke semua ti enda nemu leju nyukung enggau meri peransang ngagai aku ari ngelamatu ti udah.

“Arap mega ACSJ ke-6 tu mai pemujur enggau pengaga ngagai semua finalis sereta enggau peminat lagu Iban,” ku Eqya.

Lagu Siti Sumpah Siti Danji

Finalis kedua ba berita anugerah tu nya Dominic Christy ke madahka penatai diri ari Sri Aman.

Ba industri muzik Iban, Dominic Christy ukai mega orang baru lban udah kala nyadi artis album kompilasyen
kenyau ari taun 2012 datai ke 2019.

Dalam taun 2012, Dominic udah kala ngerikot single duet “Honeymoon” bepadu nyawa enggau Lincha
Augustine.

Nangkan ke nya, iya begulai enggau artis bukai ba album kompilasyen gawai ari ANP Music.

Ba ACSJ ke-6 tu Dominic Christy bentaruhka lagu popular iya Siti Sumpah Siti Janji (SSSJ).

Lagu SSSJ siti lagu berentak lubah sereta nyadi lagu ti chukup dikerinduka semua peminat lagu Iban.

SSSJ nya siti lagu ti ditengkebang penanyi tebilang Lucy M.

“Ba aku, SSSJ tu siti lagu ti pemadu dikerinduka aku. Iya ngenang pengerindu ti ditanggam rat datai ke pengujung nyawa.

“Maya kitai ke besulu, kitai enggau naka ulih bedanji enggai beserara lalu sanggup nempuh semua penguji.

“Enti ulih anang mih mungkir danji nya laban ati kitai deka telih enti siku ari kitai ti besulu ngemulaka pangan diri.

“SSSJ nyeritaka danji ti tuchi laban bela enggai ngelebu pangan diri tang sama dibai sampai ke pengujung nyawa,” ku Dominic nusui pasal lagu ti udah ngangkat sereta nyungkak nama iya.

Ditanya naka ni iya udah nyendiaka diri ba ACSJ 6 tu,”Dominic madahka iya semampai besedia.

“Naka ke diatu aku tetap nganggap anugerah tu siti pekit ti patut ditempuh enggau ati lantang.

“Enti ulih aku mega enggai tusut runding tang nganggap iya baka pekit bukai.

“Taja pan munyi nya ukai reti ACSJ tu nadai rega tang mina aku enggai kelalu ngenusah ati diri empu.

“Ba aku ACSJ tetap siti anugerah ti patut dipebasa sereta disukung semua.

“Bula ga enti madah diri enda besedia laban kelimpah ari lagu aku mega bisi nyendiaka gari tauka pekayan ti dikena maya nya ila,”ku iya.

Ngenang pasal pekayan, Dominic meri besai terima kasih ngagai Gabby Pearl Besuty & Butik Sri Aman laban udah sanggup melanja pekayan ti dikena iya maya ACSJ tu ila.

“Ngagai semua bala pangan, terus mih meri sukung ngagai finalis ti dikerinduka kita.

Terima kasih ngagai kita ti semampai nyukung aku ngelama tu. Pia mega semua Dj radio, palan pemerindang, raban pemberita enggau semua ti ulih sebut ditu,” ku iya.

Anugerah Carta Sapa Juara Waifm dikearap ulih ngangkatka pengerembai enggau kualiti lagu Iban.

Bala artis mega patut enda belampung ati meri sukung laban dia mih palan endur sida bekunsika kreativiti diri ba pekara seni.

Kelimpah diberi standard, rega enggau puji, bala artis mega diberi siti chabar berebut nyadi iya (artis) ti pemadu badas; ukai berebut ngena chara dengki enggau chemuru tang berebut nunjukka pemereti ati enggau basa diri ngagai diri empu, orang bukai enggau industri.

Alah enggau menang nya adat pekit tang champion ke amat nya sida ti ulih nerima pengelemi diri lalu enda kelalu ngeninggi diri maya ke menang.

Suara Sarawak