‘Bekikis Bulu Betis’ ngerichah GYF20

KUCHING: Sepenyampau 250 nembiak ari 107 bengkah menua dirami ba sebengkah pengerami makai lemai dikumbai Global Youth Forum Co-operative Entrepreneurship 2020 (GYF20), malam kemari.

Penatai bala nembiak tu disambut enggau pengawa main asal pupu bansa di Sarawak baka tanda asal bansa Melanau, Bidayuh sereta Orang Ulu.

Ba pengerami nya, Menteri Dagang Temuai, Seni enggau Main Asal ti mega nyadi Menteri Nembiak, Lumba enggau Main Datuk Abdul Karim Rahman Hamzah sereta Menteri Muda Nembiak, Lumba enggau Main, Datuk Snowdan Lawan ti nyadi temuai dipebasa enda muai peluang beperindang malam nya.

Nengah lagu tebilang Iban, Bekikis Bulu Betis, seduai bepadu nyawa seraya ngeranchakka agi pengerami malam nya merindang bala pengari nembiak ari selampur dunya.

GYF20 keterubah tu diatur Angkasa enggau kerejasama International Co-operative Alliance (ICA) sereta European Union (EU).

Suara Sarawak