Semua sekolah di Sarawak akan dinaik taraf mengikut standard tertentu

Bekimpin profesional, anang mantaika isu ti enda patut

Facebook
Twitter
WhatsApp
Telegram
Email

KUCHING: Semua parti politik ti deka bekimpin maya Pengawa Bepilih Nengeri Ke-12 (PRN-12) Sarawak dipinta bejalaika pengawa nya enggau manah nitih sereta chara profesional.

Pemikir Politik, Profesor Datuk Mohd Fadzil Abdul Rahman madah, pekara nya beguna amat ngambi sida enda mantaika isu ke enda patut nyentuk penyarut nyadi.

“Bekimpin mih enggau manah sereta bejaku pasal tuju kita ari bejaika parti tauka bala bukai ke deka bediri ila,” terang iya.

Dulu ari nya, Chairman Komiti Besai Pengawa Bepilih (SPR) Datuk Abdul Ghani Salleh ba aum pemberita pengudah Aum Khas PRN-12 madah timpuh bekimpin ditetapka pengelama 12 hari pengudah mantaika nama chalun ti deka bediri kena 6 Disember tu nyentuk pukul 11.59 malam, 17 Disember.

Berebak enggau nya, Fadzil madahka timpuh nya chukup enggau penyadi pandemik lalu enda begunaka timpuh panjai.

“Taja Atur Pengawa Standard (SOP) PRN Sarawak Ke-12 apin diterang silik tang engka lebih pasal nyaga diri… semua parti politik mesti meri kerejasama dikena nyeliahka ulah ngembuan pengawa kediri tauka parti.

“Nya kebuah, kitai ngarapka semua orang ulih meri kerejasama lalu anang kelalu bekimpin nyentuk nyau enda ingatka SOP laban nya tau ngasuh kes berampit tauka engka penyarut di menua tu,” ku iya.

Ngelansa pasal hari ngundi PRN Sarawak 18 Disember tu, iya madahka nya haribulan baka ti udah dijangka laban berundingka sebedau Hari Krismas enggau Taun Baru.

Ba lansa sama, iya ngelalau SPR ulih berundingka pengawa nendurka atur bekimpin ba menua ulu ketegal kurang bekenaka media rama enggau penanggul arus penyambung.

“Nya alai, atur ditendur maya bekimpin betimpai mua mesti diterit nyengkaum atur terit enda ulih bekimpin ba palan mensia mayuh nyentuk kes berampit Covid-19 nyadi.

“Kitai mesti belajar ari PRN Melaka, kaban politik enda ibuhka sida disaman laban ulih mayar saman tang isu diatu iya nya sida mesti bebasa enggau nitihka atur ke udah ditetap.

“Kaban politik enggau parti politik mesti bejalaika tanggung pengawa maya bekimpin, anang berunding pasal kimpin, menang undi aja nyentuk enda ingatka tanggung pengawa diri iya nya nentuka pengelikun rayat dijaga, nya entara tanggung pengawa sida,” ku iya.

e-Akhbar Suara Sarawak

Berita Berkaitan

E-Paper

23 Mac 2023

Berita Terbaru