PENGERINDU besai bekunsi pengaga, penyiru, pengasih enggau penyayau mujur ngerandang dagang ngagai siku peranak Kapit, Winna Roshelly Bekeli.

Pengagit enggau penyiru iya deka bekunsika semua pengasai nya kelimpah nyungkak penatai pemisi tambah mujur muka pintu ati iya ngaga sereta nyendia servis nganjung bouquet.

Iya ti rindu agi dikangau ngena nama Inna madahka diri udah ngepunka dagang nya kenyau ari taun 2019 pengudah tembu Sijil Tinggi Pelajaran Malaysia (STPM) nyentuk diatu.

PENELEBA BEREGA
Tuchum manis, ketawa enggau ai mata gaga ti tepanchar ba mua penguna lebuh nerima bouquet nya ngasuh iya ransing bejalaika servis nya.

Inna madah, genap kali iya meda enggau ngasaika emosyen nya ti tepanchar ba mua penguna, enda berasai mata iya nyau belai.

“Kekadang enda berasai aku bekunsi sabak enggau sida. Ukai sabak sinu tauka tusah ati tang nya sabak gaga.

“Tebal agi bala penguna aku chukup gaga enggau beterima kasih lebuh nerima bouquet tu ari orang dikesayau sida.

“Tu siti peneleba manis, berega enggau besai reti ngelai sida dibasa, diaku, disayau sereta meruan dikeingatka orang dikesayau sida.

“Ambi ke chunto, lebuh Hari Indai, mayuh bala anak meri tepa baka bouquet tu ngagai indai sida dikena mandangka penyayau enggau pengasih ngagai indai diri,” tusui Inna.

Ukai semina Hari Indai aja tang nya mungkur semua hari besai bukai baka Hari Pengada, Hari Apai, Hari Genap Taun Nikah, Hari Krismas, Hari Valentine enggau ti bukai.

Tebal agi sida ti ngena servis nya, ku iya, deka meri surprise ngagai orang dikesayau ketegal sida enda ulih ngintu hari besai nya begulai laban jauh ba menua orang.

“Tu meh ngasuh aku majak ransing nyendia servis tu kelebih agi ba Bagi Menua Sibu enggau ti ngelingi tu,” ku iya madah baru.

RANSING BELAJAR PEKARA BARU
Pengelandik Inna ba pengawa ngaga bouquet nya endang dipelajarka iya empu nengah pelasar media rama baka YouTube enggau Tiktok.

Keterubah suba, iya nguji deka ngambi kus ngaga bouquet tang ketegal penanggul suntuk belanja, niat nya lalu diketuka iya.

Taja pen napi penanggul nya tang nya enda madamka minat enggau niat iya ti deka bekunsika pengaga, penyiru, pengasih enggau penyayau nengah pengawa ngaga sereta nyendia servis nganjung bouquet.

Iya madah, pemansang teknologi digital kemaya hari tu meri pengelebih ngagai iya dikena belajarka chara ngaga bouquet.

“Keterubah aku ngepun ngaga bouquet, sinu amat asai anak ati meda asil keranjai jari diri enda kemas baka asil keranjai jari orang bukai ti udah bepenau.

“Pekara nya enda ngasuh aku tabar ati lalu mantul pia aja.

“Ari pengurang nya meh aku majak ransing belajar chara pemun ngaga bouquet nengah pelasar YouTube enggau TikTok kelimpah ngulihka buah runding dikena nempa kreativiti diri.

“Pengudah aku nemu chara ngaga bouquet, dia deh aku lalu ngerembaika kreativiti diri empu ngena bemacham perengka,” ku Dara Kapit nya.

Tampung iya, kekadang penguna meri iya gambar tusun atur bouquet dikedeka sida lalu Inna semina nitih tusun atur bouquet dalam gambar nya.

Inna mega ngena buah runding enggau kreativiti diri empu enti penguna ngelempai penuh pengandal ati sida ngagai iya.

Entara bansa bouquet ti disediaka iya nyengkaum set bouquet chokelit, duit, bungai idup enggau ti bukai sereta bepanggai ba peminta penguna.

Genap bouquet nya dijual iya berengkah ari RM30 enggau besai agi ari nya bepanggai ba langkar tengkebang sereta perengka dikena.

Lebuh dirandau senentang untung diulih ari pengawa dagang nya, Inna madahka diri bulih untung entara RM600 nyentuk RM1,000 enggau lebih agi ari nya sebulan bepanggai ba pemayuh peminta penguna.

SERURAN DITAPAT
Anak ketiga ari empat diri menyadi nya madahka diri berasai temegah laban servis bouquet iya seruran nerima timbal manah ari penguna kelebih agi komuniti Sibu enggau ti ngelingi nya.

Iya madah, genap hari servis bouquet iya enda kala pungkang ditapatka penguna ti deka meri tepa enggau surprise ngagai orang dikesayau sida.

Nya nanda ke penguna tepantup enggau ngelempai pengandal ati ngagai servis bouquet ti disediaka Inna.

Pedagang ti beumur 23 taun nya madah, iya endang semampai ngemerat kualiti, kreativiti enggau peminta penguna.

“Tebal agi penguna aku endang komuniti Sibu, Bawang Assan, Durin, Julau, Kanowit enggau Kapit lalu aku nyendia servis nganjung bouquet tu terus ke rumah sida.

“Ukai naka nya aja, aku bela ngembuan penguna tetap kediri empu lalu penguna aku majak nambah ninting hari.

“Kekadang sida ngambi kediri ke rumah aku ba Sengan, bisi mega sida begunaka servis nganjung terus ke rumah.

“Taja pen sekeda rumah penguna kelalu jauh enggau mar dilawa tang aku tetap sabar lalu naka ulih nyendia servis pemadu manah ngagai sida.

“Laban aku nemu pemesai pengandal ati sida ngagai aku ngambi ulih meri tepa enggau surprise berega ngagai orang dikesayau sida,” terang iya.

Lebuh tepeda ke ai mata gaga enggau tuchum manis tepanchar ba mua penguna maya nerima ‘tepa berega’ nya, iya bulih pengering baru.

Nya meh nyadi penawar ngagai semua pengelelak enggau pengiruh iya beanjungka tepa nya.

KENANG PAIT ENGGAU MANIS
Peneleba pait manis nya endang udah nyadi asam garam ba genap pengawa dikereja kelebih agi ba pengawa dagang.

Enda nyalah baka tayar ti semampai bepusin bisi maya ba atas lalu bisi maya baruh.

Lebuh teterap, tetingkap, tesungkur tauka tejelepi, anang sesekali nyerah alah tang angkat meh ngena tungkat pengandal.

Pechaya meh penguji ti diasaika kitai sehari tu deka nempa kitai nyadi orang ti tuai runding, tan besemekih sereta pintar ngaga pemutus enggau ngena peluang dudi hari.

Lima taun udah mekuhka dagang nya, bemacham peneleba pait enggau manis diasaika dara ti chukup landik nyumai nya.

Ku tusui Inna, sekumbang bejalaika pengawa dagang bouquet nya, iya suah dikeduan enggau dikemula penguna ti enda beradat.

“Sida madahka diri deka meli lalu ngasuh nganjung bouquet ke rumah tang ba minit ke penudi, sida nginsil semua nya.

“Aku ukai semina rugi ari pengelelak, pengiruh enggau awak ngaga bouquet tang rugi ari sukut belanja bebelika perengka dikena nyendia bouquet nitih peminta sida.

“Keterubah suba, bisi penguna meli bouquet enggau nguna servis nganjung tang nyentuk diatu sida lalu nadai mayar aku.

“Nya alai, dikena nyeliah pekara tu nyadi baru, aku ngasuh penguna mayar tumu lalu enti duit udah masuk, baru aku ngaga bouquet.

“Bisi mega penguna meli bouquet ba minit kepenudi lalu ngasuh nganjung ke rumah tekala nya nyentuk aku nyau kiruh sereta berumban nyendia semua perengka dikena,” ku iya nusui sebana diri.

Ngenang peneleba manis diri, Inna madah, mayuh peneleba manis diasaika iya lalu pengawa ngintu Hari Indai taun nyin kemari endang besai reti ba iya.

Ku iya, rambau Hari Indai 2022, iya mujur nyual 38 set bouquet sekali enggau kek.

Lebih manis, semua indai ti nerima tepa enggau surprise nya chukup gaga laban ngasaika diri diaku, dikeingat, dikeibuh enggau dikesayau bala anak diri.

Bisi mega bala anak ngasuh Inna macha pesan Hari Indai nuju indai dikesayau sida lalu enda berasai indai nyabak gaga lebuh mendingka pesan ti balat negu tangkai ati sida.

Nya meh ti ngasuh Inna majak ransing bejalaika dagang bouquet nya laban ari nya iya ulih nyadung pengaga, pengasih, pemaik enggau pengelantang ngagai orang bukai.

KEREMBAIKA MINAT ENGGAU PENAU DIRI
Dara bajik nya ngelalau mensia mayuh ngambi ngemansangka minat dikembuan sida dikena ngaul pengawa dagang ti ulih nyungkak penatai pemisi tambah.

Iya madah, kos pengidup kemaya hari tu chukup besai lalu kitai enda ulih bepanggai ba siti batang pengawa aja.

Nya alai, ku iya, kemansangka meh penau enggau pengelandik dikembuan kitai dikena nyungkak penatai pemisi tambah.

“Lebuh ngaul pengawa dagang, minat, pengeransing enggau kreativiti beguna amat ngambi kitai ulih besemekih sereta nyendia servis nyulut.

“Anang sesekali mantul lebuh napi penguji tang belajar meh ari pengilap enggau orang bukai ngambi kitai ulih beretan lama ba pengawa dagang.

“Lebih beguna, pandangka meh penyayau enggau penyiru kitai ngagai orang dikesayau sekali ke nya apai, indai, aki, ini, sulu ati, menyadi, kaban tauka sapa-sapa aja orang ti berega ba pengidup kitai.

“Beri meh sida tepa enggau surprise ba ‘hari besai’ ngambi sida ngasaika diri dikeibuh enggau dikesayau belama,” ku lalau Inna seraya madahka diri deka ngerembaika dagang bouquet nya.

Ngena peluang berega tu, Inna meri besai terima kasih ngagai semua orang ti seruran nyukung dagang bouquet iya kelebih agi bala penguna, bala bakih, kaban belayan enggau sida sebilik.

“Terima kasih udah ngelempai pengandal ati ngagai asil keranjai jari enggau servis bouquet aku.

“Sukung enggau kerejasama penuh ari kita besai bendar reti ba aku sereta nyadi pun pengering enggau pengeransing dikena aku nyendia servis pemadu manah ungkup kita.

“Tuchum enggau ai mata gaga ti tepanchar ba mua kita enda nyalah baka panchar berekat pengaga penuh pengasih,” ku iya seraya madahka diri chukup temegah.

Mensia mayuh kelebih agi komuniti Sibu, Durin, Bawang Assan, Kanowit, Julau enggau Kapit ti deka nemu silik senentang produk enggau servis bouquet Inna diperansang ngelawa Facebook Winnaa Inna Bekeli, page Facebook Innaa Bouquet Sibujaya Sibuu, TikTok @Winnainna, Instagram @innainna00 tauka betelefon terus ngagai iya ba lumur 014-9771382.